ISINAGAWA kamakailan ng National Water Resources Board (NWRB) ang “Seminar on Integrated Water Resources Management (IWRM) and Climate Change Adaptation (CCA)” sa Hotel Alejandro, Lungsod ng Tacloban sa Leyte.
Layunin ng naturang seminar na itaguyod ang higit pang pagkakaunawa sa ating mga yamang tubig at maging pamilyar sa mga stakeholder ang nauukol sa Water Code of the Philippines at mga inamyendahang Implementing Rules and Regulations (IRR).
Ang mga nakibahagi sa seminar ay mula sa iba’t ibang tanggapan sa Rehiyon 6–8 na kinabibilangan ng mga ahensiya ng pamahalaan, yunit ng lokal na pamahalaan, water district, non-government organization, ang akademya at ang pribadong sektor.
Ayon kay OIC Executive Director Elenito M. Bagalihog ng National Water Resources Board (NWRB), kailangan ng agarang pagtugon sa mga problema na may kaugnayan sa tubig sa pamamagitan ng pagkakaisa upang ma-pagtagumpayan ang mga hamon tulad ng pagkapira-piraso, dami at kalidad ng magagamit na tubig, pagpapanatili ng ekolohikal na integridad at mabawasan ang epekto ng pagbabago ng panahon. Sinabi rin niya na ang pagsasagawa ng IWRM ay nakilala bilang pangkalahatang estratehiya sa pa-mamahala ng tubig sa ilalim ng kasalukuyang Philippine Development Plan at ang pagpapatupad ng IWRM ay itinuring bilang isang istratehiya ng CCA.
Kritikal ang tungkulin ng NWRB sa pagpapatupad at operasyon ng IWRM sa bansa bilang ahensiya sa regulasyon at koordinasyon para sa pamamahala at pagpapa-unlad ng mga yamang-tubig. Ito ay patuloy na isinasagawa ang mga programa at proyektong magsusulong sa IWRM. Ang mga serye ng seminar ukol sa IWRM at CCA ay ginaganap sa iba’t ibang pook sa tatlong heograpikal na rehiyon ng bansa, sa Luzon, Visayas at Mindanao.
The post AGARANG PAGTUGON NG NWRB KUNG MAY KAUGNAYAN SA TUBIG appeared first on Remate.
