HINDI natin malilimutan ang mga disgrasya na may kaugnayan sa mga paputok. Ang dami nang namatay, nasugatan, nabalda, nasiraan ng ari-arian at kung ano-ano pa. At ito ang isa sa mga gabay natin sa pagtingin sa paggamit ng paputok kahit sa anomang okasyon.
Sa ngayon, ang Bagong Taong 2014 ay sasalubungin ng sambayanan ilang araw na lang mula ngayon. At tiyak na maraming lugar ang magkakaroon ng mga paputok o pagsabog.
LIGAL NA PAPUTOK
Isa sa mga kauna-unahang dapat na tingnan ng mga gumagamit ng paputok ang ligalidad ng kanilang mga binibili.
‘Yun bang — may mga pinapayagan ang pamahalaan na klase ng paputok. Mayroon din itong ipinagbabawal. Kung tutuusin, delikado ang lahat ng mga paputok pero sa pamamagitan ng mga batas at patakaran sa industriyang ito, kahit papaano ay mababawasan nang malaki ang mga disgrasya sa paggamit ng mga ligal na paputok.
‘Yan ay kung gagamit tayo ng mga ligal o pinahihintulutan ng pamahalaan. Huwag doktorin Kung nakabili na tayo ng mga paputok, huwag nating doktorin ang mga ito, mga Bro. Mayroon kasing bumibili ng bulto-bultong paputok sa mga tindahan, pero pagkatapos ay kinakalas ang mga ito saka nila pagsasama-samahin para gawing malakas na bomba. Tuwang-tuwa silang mayayanig ang mga bahay ng mga kapitbahay o kaya mabasagan ang mga ito ng mga salamin.
Dito nagaganap ang mga disgrasya na dapat sanang naiwasan. Nagiging tunay na mapanganib ang ligal na ginagawang iligal.
MAGBANTAY
Kung gusto nating maging ligtas ang ating mga sariling buhay at ari-arian sa darating na Bagong Taon, kailangan tayong magbantay lahat.
Kailangan nating bantayan ang ating mga kapitbahay. Sa una pa lang na palatandaan na may mga iligal na paputok, dapat na sabihan agad ang mga may hawak at nagpapaputok nito na huminto na. Kung ipagpapatuloy nito ang paggamit ng mga iligal at malalakas na paputok, maaari na sigurong itawag ang pangyayari sa barangay o sa pulisya. Bahala na ang mga pulis o barangay official na dumisiplina at pahintuin ang mga iligalista para na rin sa kaligtasan ng lahat.
Kung kinakailangan na tayo’y tumestigo, gawin natin. Lalo na kung mahihirapan ang mga awtoridad na kumuha ng mga materyal na ebidensya. Alalahaning hindi biro-biro ang mga nakikitil o nasisirang buhay at ari-arian dahil sa iligal na paputok at iligal na gawain dito.
BATA SAWAYIN
Hindi talaga dapat na pahawakin ang mga bata ng mga paputok. Sapagkat walang kaalam-alam ang mga ito sa mga dapat na gawin kung may mangyari. Sa pagpapaputok lang ng mga kwitis o pagsindi ng mga umiikot o nagbubuga ng apoy na mga paputok, dapat na isinasaalang-alang ang mga buhay at ari-arian na nakataya sa paligid. Ang bata ay walang alam ukol sa mga ito at tanging ang kasiyahan niya ang mahalaga sa paggamit ng mga paputok.
MATATANDA, PROPESYUNAL
Ibig nating sabihin, mga Bro, dapat na mga propesyunal o may edad ang gagamit ng mga paputok o pailaw. Dahil alam ng mga ito ang ligtas na paggamit.
At kung may disgrasya, kahit papaano ay alam ng mga ito ang gagawin gaya ng pagtawag ng tulong o tuwirang pagliligtas mismo sa mga nadidisgrasya. Ang mga matatanda rin ang may kaisipan ukol sa paggamit ng mga sasakyan papunta sa mga ospital sa mga oras ng disgrasya.
LUGAR NG PAPUTOK
Maganda ang nasimulan ng mga barangay na isagawa ang mga pagpapasabog sa mga lugar na itinakda ng mga barangay na ligtas na lugar. Kung ipatutupad ng mga barangay, munisipyo at lungsod ang ganitong sistema, nakatitiyak tayo ng ligtas na paggamit ng mga paputok.
Siyempre pa, naririyan ang atensyon ng mga nagbabantay na mga awtoridad at kakayahan nilang magresponde kaagad sa hindi kanais-nais na pangyayari.
Bahala sila sa iyo na itakbo sa ospital o sa punerarya kung may mangyari. ‘Yung punerarya…huwag naman sana.
KALIGTASAN SA TINDAHAN SA BOCAUE, BULACAN
Ilang beses nang nagkaroon ng mga pagsabog sa mga tindahan. Lahat ay tumatakas, maging ang mga pulis at bumbero kapag nagaganap ito. Dahil masahol pa sa bombang Hapon ang mga pagsabog kung sabay-sabay na sumasabog ang lahat ng mga paputok sa mga tindahan. May apoy na, may mga lumilipad pang mga shrapnel mula sa lahat ng sumasabog na salamin ng mga bodega, sasakyang nadadamay at kung ano-ano pa.
TESTING AT TERORISTA
Bukod sa nakapalibot na mga drum ng tubig sa mga tindahan, mayroon pang mga nagbabantay na bumbero sa mga sentro ng paputok gaya nga ng Bocaue, Bulacan.
Sa kabila nito, may nagaganap pa ring mga pagsabog sa lugar. At kabilang sa mga sinasabing dahilan ay ang paninigarilyo ng mga kostumer o pag-testing sa mga binibili ng mga ito. Ang lahat ng ito ay ipinagbabawal ngayon.
Ang isang problema, paano ipagbabawal ang mga terorista kung sila ang magpapanggap na mga kostumer? Mag-ingat po tayong lahat at ito ang buod ng mensahe natin kaugnay ng mga paputok.
oOo
Anomang reklamo o puna ay maaaring iparating sa www.remate.ph o i-text sa 09214303333.
The post SUNOG AT BOMBA SA PAPUTOK appeared first on Remate.
