O ANO na ang nangyayari sa mga pulis?
Kung hindi kotong cops, pabaya at iwas-pusoy sa trabaho, torture cops naman!
Naniniwala tayo, mga Bro, na nakararami sa mga pulis ang matitino.
Pero ang masama, sumisikat nang todo ang pulisya sa mga masasamang balita na gawa ng mga ito.
Paano kaya itutuwid ang pagkakaroon ng napakalalim na mantsa sa uniporme ng mga pulis at kalawang sa kanilang mga tsapa?
TORTURE COPS O POLICE BRUTALITY
Torture cops ang tawag sa may 10 pulis sa bayan ng Biñan, Laguna.
Inilantad mismo ng Commission on Human Rights ang police brutality na ito na pinagsumbungan ng mga biktima ng torture.
At onli in da Pilipins ang istayl ng pag-torture ng mga ito. Ginawang roleta na sa bawat ikot nito ay may nakasaad na mga parusa para sa pagpapalabas ng ebidensya o para sa katuwaan lang ng mga pulis.
May para kay Pacquiao na ang ibig sabihin ay magiging bugbog-sarado ang detenido o preso at mayroong paniqui na nakataas ang mga nakagapos na paa ng kung ilang minuto.
Ang masakit, may iba pang mga pulis na nangto-torture.
ALAM NILANG BAWAL
Walang pulis ang hindi nakaaalam na bawal sa batas at Konstitusyon ang pag-torture ng kahit sinoman.
At ang mga pulis pa nga ang inaatasan ng batas na manghuli sa mga torture cop o nagsasagawa ng police brutality.
Pero bakit sila pa ang nangunguna sa pag-torture o nagpapakita ng kalupitan?
May natutuwa naman sa torture na isinasagawa sa mga suspek sa droga. Pero bawal pa rin na i-torture ang mga ito kahit na isinusuka na ang mga ito ng lipunan.
Hindi na natin dapat ibalik ang kasaysayan na naging sikat ang mahal kong Pinas sa mga torture cop.
Makaraan ng martial law, pinamayani na natin ang pagrespeto sa buhay at dangal ng tao at hindi pupuwedeng paglaruan sa malupit na paraan.
HINDI UUSAD
Nasubukan na ba ninyong magsumbong sa pulisya ukol sa hindi ninyo nakilala na gumawa sa inyo ng krimen?
Diyan kayo makararanas ng zero na accomplishment, mga Bro, ng mga pulis.
Halimbawa ang mga biktima ng riding-in-tandem.
Ang unang tanong ng mga pulis ay ito: “Nakilala ba ninyo ang mga gumawa nito sa inyo?”
Kung sasabihin ninyo na hindi dahil naka-helmet ang mga tarantado at madilim noong nangyari ito, patay na ang iyong kaso.
For blotter purposes na lang ‘yan. Kung hindi naman, gagawa ng palusot ang mga pulis at sasabihin nila sa iyo na hindi nila sakop ang krimen kahit naganap mismo sa tungki ng kanilang mga ilong.
Nawala na ang espiritu ng pulisya na nakikinig sa mga reklamo, gumagawa ng aksyon sa kanilang mga isipan at mabubulaga ka na lang isang araw na bitbit-bitbit na nila ang mga suspek sa krimen.
PERA-PERA ANG AKSYON
Heto pa.
Naranasan na ba ninyo ang ma-kidnap for ransom o mamatayan na gawa ng mga riding-in-tandem sa mga may dalang malalaking salapi palabas at papasok sa mga bangko?
Narito ang isang tunay na karanasan na karanasan din ng marami sa mga biktima.
May mga grupo ng mga pulis na mag-aalok ng tulong para sa ikadarakip ng mga kriminal.
Pero hindi aalis ang mga ito sa iyong harapan nang walang pinag-usapan ukol sa pera na gagamitin sa operasyon kuno nila.
‘Pag napapayag ka, kuwidaw ka sa iyong salapi.
Hihingan ka ng daan-daang libong piso para umano sa kanilang pagtiktik at pagpapadala ng mga pulis para makilala at ma-trace ang mga salarin.
Anak ng tokwa, lilipas ang isang linggo o dalawang linggo, wala pa ring development.
Babalikan ka ng mga pulis at hihingi ulit ng panggastos.
Wala kang kamalay-malay na wala pa lang ginagawa ang mga ito kundi maghapi-hapi sa ibinibigay mong panggastos.
Ano ngayon ang gagawin mo?
Ang tiyak, daanin mo na lang sa ransom ang kinidnap o tanggapin mo na lang na namatayan ka ng kamag-anak o kaibigan.
Charge to bad experience na lang ang mga iskalawag na pulis.
MAGAGALING MANGHULI
Pero mayroon at marami rin talaga ang mga magagaling.
Napakagagaling ang mararaming pulis sa panghuhuli ng mga dyipni, traysikel at iba pang pampublikong sasakyan.
Idinaramay rin ng mga ito ang mga pribadong sasakyan, cargo trucks at nasa droga.
Hindi rin nakaliligtas ang mga vendor at maglulugaw.
Dito sila magagaling at walang araw o gabi at oras ang kanilang sinasayang.
Patrulya rito, patrulya roon ang ginagawa ng mga ito dahil may tiyak na kita rito.
Maliliit man, sa rami ng kanilang hinuhuli at iniikutan na maliliit na mamamayan na gustong kumita para makaalpas lang ng gutom, ay malaking supot ang kanilang naiuuwi.
SISTEMANG QUOTA
Pero may basbas ang mga bossing ng mga iskalawag na street cop.
Karaniwan nang ginagawa ng mga bossing ang mag-order ng quota na huli bawat araw.
Usong-uso ito sa Kamaynilaan at mga karatig na lalawigan.
Pinagagalitan o ipinatatapon sa kangkungan ang mga pulis na hindi makasunod sa quota at pinapalitan ang mga ito ng mga makakapal ang mukha.
At ang masama, ito na ang nagiging mukha hindi lang ng Philippine National Police kundi ng pamahalaan na rin mismo.
Kawawang Pinas.
oOo
Anomang reklamo o puna ay maaaring iparating sa www.remate.ph o i-text sa 09214303333.
The post ANYARE SA MGA PULIS? appeared first on Remate.
