NOONG Sabado (Pebrero 22), naranasan ko ang sobrang problema sa trapiko habang ako ay patungo sa town proper ng lungsod ng Malabon.
Mantakin mo, sa limang kilometrong haba patungo ng Malabon, tinahak ko ito ng halos tatlong oras dahil sa buhol-buhol na trapiko.
Una kong napansin ang dagsa ng mga sasakyan paglagpas ng Monumento patungo ng Sangandaan kaya binaybay ko ang direksyon ng 10th Avenue.
Dahil matrapik na rin ang lugar, mula Caloocan City Hall, nagpasya akong dumiretso sa Mabini Blvd., ngunit dito na ako na-trap. Dumami nang dumami ang bilang ng bumibiyaheng truck patungo sa Pier ng Maynila hanggang mapuno ang C-3 Road at ang buong kapaligiran.
Naghanap ako ng madaraanang sulok-sulok pero parang kadena na ang buhol ng mga truck kaya wala akong nagawa kundi mabuwisit na lang.
‘Di lang ako ang naasar sa tindi ng trapiko kundi pati ang mga drayber at motorista na naipit na rin sa trapiko.
Kung ako ay nabubuwisit, mas matindi ang galit ng mga truck driver. Sinisisi nila ang pinaiiral na truck ban ni Erap sa Maynila.
‘Di lang mga driver at motorista ang apektado sa monstrous traffic, kundi ang mga residente ng Dagat-dagatan sa Camanava area.
Nang dahil sa buhol-buhol na trapiko, ‘di makalabas ang mga residente sa kanilang paroroonan gamit ang kanilang mga sasakyan.
Dahil sa traffic ban na ‘yan, pakiwari natin, eh, nagka-problema ang mga local government unit na kapitbahay ng Maynila.
Ano na ang nangyayari sa Maynila, Mayor Erap?
SALOT NA PERGALAN
INIREREKLAMO ng mga taga-Quezon ang nagkalat na pergalan (perya at sugalan) sa mga bayan ng Buenavista, Tagkauwan at Padre Burgos.
Lantaran daw ang operasyon ng mga pergalan na ‘yan pero ang kapulisan ay ‘di kumikilos para ipahinto ang mga ito.
Paging, Gen. Jess Gatchalian.
The post ANO ANG NANGYAYARI SA MAYNILA? appeared first on Remate.
