PINAG-UUSAPAN ngayon ang blog ng dalawang turista tungkol sa hindi magandang karanasan nila sa pag-iikot sa isang bahagi ng Pilipinas at pagtikim sa mga pagkain doon. Sabi ng dalawang turistang ito, ang hanap nila ay mga local food at ang tinutukan nila ay mga “street food.” Disappointed daw sila at hindi nila recommended ang mga ito. Sumakit daw ang tiyan at nahilo sila.
Hindi ito ang unang pagkakataon na may nagsulat ng hindi maganda tungkol sa Pilipinas. May nagsulat na rin na hindi maganda ang ating mga airport at malala na raw ang kikilan sa mga entry port ng bansa.
Natural lang na ikinagalit ng ilan nating mga kababayan ang blog tungkol sa pamimintas sa ating mga street food.
Sinisiraan daw tayo lalo pa at malawak ang mga nararating ng mga blog na ganito dahil nga sa kapangyarihan ng internet. May mga nagsabi na constructive raw naman at makatutulong ito para mapabuti ang serbisyo sa Pilipinas.
Hindi talaga maiiwasan ang mga pamimintas na ganito. Ang isipin na lang ay meron rin namang magagandang puna tungkol sa Pilipinas na pinakakalat din ng internet, kaya naman marami pa rin ang mga turista na dumarating.
Sa aking palagay, hindi sapat ang mga pintas para umiwas ang mga turista sa ating magandang bayan.
Ang masamang opinyon tungkol sa “street food” sa ilang bahagi ng Pilipinas ay hindi naman totoo para sa lahat, may ilan lang ang nagreklamo pero marami pa rin ang kuntento sa inihahain natin sa ating mga bisita.
Ang masakit minsan ay ang dagliang pagsang-ayon ng ilang Pinoy na nasa ibang bansa at tumutulong pa sa pamimintas.
Oo at hindi tayo dapat masaya sa masasamang balita tungkol sa bayan natin pero hindi rin sana nagdagdag pa sa sama ng loob ng mga Pinoy sa pagpapatotoo pa ng maling opinyon kahit ito nga ay opinyon lang.
May nagsabi sa akin na isang staff ko, nawalan na raw ng karapatan ang ibang pinoy na mamintas ng tungkol sa Pilipinas dahil umalis na sila at iniwan na ang bansa at sumumpa na sila ng kanilang pagtangkilik sa bansang kanilang tinitirhan ngayon.
The post PAMIMINTAS appeared first on Remate.
