TRENDING ngayon ang Puerto Princesa, hindi dahil sa angkin nitong yaman at ganda kundi sa napapabalitang recall kay Mayor Lucilo Bayron.
Nakalulungkot dahil ngayong summer vacation, panahon ng pasyalan – pagkakataon na magkamal ang lungsod ng kita sa turismo.
‘Di naman kasi lingid sa kaalaman ng madla na ang Puerto Princesa ay mayaman sa magagandang tanawin na lubos na kinagigiliwan.
Dahil sa malinis at kaaya-ayang mga lugar, tulad ng underground river, ‘di lang mga Pinoy, kundi maraming banyagang turista ang bumibisita. Pero dahil nga sa napapabalitang ‘away’ sa pagitan ni Mayor Bayron at ang mga Hagedorn, aba’y ‘di ito maganda para sa lungsod.
Sa bisa ng pagkapanalo sa May 2013 polls, matapos ang mahabang panahon, nagkakaroon ng bagong alkalde ang Puerto Princesa sa katauhan ni Mayor Bayron.
Tinalo ni Mayor Bayron ang maybahay ni dating Mayor Edward Hagedorn na tumakbo sa pagkasenador, subalit ‘di rin sinuwerte.
Masakit para sa mga matagal na naglingkod na maayos din namang nanungkulan na matalo sa eleksyon, pero ganu’n talaga ang buhay. Lumalabas sa mga ulat na si dating Mayor Hagedorn ang utak sa pagpapa-recall kay Mayor Bayron para ito’y maalis bilang Puerto Princesa mayor.
Sa mga ulat ay pinabulaanan ito ng mga Hagedorn, pero kay Mayor Bayron, naniniwala siyang si ex-Mayor Hagedorn ang utak ng recall. Simula pa lang ang away ng dalawang panig at siguradong lalaki pa ito. Ang tanong natin – kailan matatapos at saan hahantong ang kanilang sigalot?
Kung sino ang magwawagi at matatalo, panahon lang ang makapagsasabi pero alam kaya nila na habang sila’y nagbabangayan ay ang Puerto Princesa ang tinatamaan.
Dahil sa kanilang away, imbes na milyones na turista ang darating, baka iilan na lang ang bumisita sa kilalang lungsod na ito ng Palawan.
Sa mga nagkakalat na tumataas ang krimen, aber, sino nga naman ang pupunta sa Puerto Princesa kung masama ang peace and order.
Walang kasalanan si Mayor Bayron. Ang tanging dahilan kaya siya pinag-uusapan ngayon ay dahil ibinoto siya noong nakaraang eleksyon.
The post RECALL KAY MAYOR LUCILO BAYRON appeared first on Remate.