LEGAL Affairs mismo ng Subic Bay Metropolitan Authority (SBMA) ang nagsabi na ang kontrata ng Global Terminals & Development, Inc. (GTDI o Global) ay konsesyon kaya dapat dumaan sa “bidding” tulad ng sa Subic Enerzone sa kuryente at Subic Water sa tubig.
Ito Ang Totoo: ang posisyon ng Legal Affairs ay isa sa mga batayan ng Seaport Department para tutulan ang pakikipag-kontrata sa Global na tahasang nagkakontrol hindi lamang sa mga gusali sa dating Ship Repair Facility (SRF) ng US Navy kundi pati sa tatlong pier na Alava, Rivera at Bravo.
Hindi pinansin ng dating SBMA Board sa pangunguna ni Feliciano Salonga at Armand Arreza ang oposisyon na pirmado ng mga noo’y opisyal ng Seaport na sina Perfecto Pascual, Ulysses Edejer, Jerome Marinez, Fidel dela Cruz, Atty. Michael Quintos at Alex Rapsing.
Ayon pa sa mga kumontra sa naturang kontrata dahil agrabyado ang gobyerno, paglabag sa batas R.A. 9184 ang award sa Global dahil wala naman itong karanasan at hindi eksperto sa pagpapatakbo ng mga pier.
Ngayon, ang mga pumapasok sa mahigit 14 ektaryang SRF compound ay sinisingil pa raw Global ng “toll fee” o “road users tax.”
Global na rin ang nagpapaupa sa mga gusali at pasilidad na iniwan ng mga Amerikano na kahit P7.50/sqm. lang ang upa nito sa SBMA, naniningil naman sa mga nagsa-sublease ng humigit-kumulang P1,600/sqm.
Abangan ang susunod pa nating mga paglalantad kung paano inabuso ang bilyon-bilyong halaga ng ari-arian ng SBMA sa pakikipag-kontrata nito sa Global.
***
LIMANG ektarya halos ang inookupahan sa loob ng Subic FreePort ng peryahan ng isang Ricky Quiroz na nagbubukas lamang mula Oktubre hanggang Enero taon-taon.
Ito Ang Totoo: ilang beses na rin itong nahuhuli na nagpapasugal kahit sa mga bata pero ang mga kinauukulan, lalo na ang mga pulis ng Camp Olivas, Pampanga, parang wala lang matapos magkaroon umano ng usapan.
Ang SBMA Board naman, parang nagbubulag-bulagan kahit ang lupang inookupahan ng peryahan ay nasasayang lang dahil may mga negosyong nais sana itong upahan. Baka pagdaka ay maaalimpungatan na lang ang mga kinauukulan kapag sila na ay nakasuhan, sige lang.
Ito Ang Totoo!
The post PERYAHAN AT ANOMALYA NG GLOBAL SA SUBIC (2) appeared first on Remate.
