MABIGAT at malaman ang mga binitiwang salita ni Princess Jacel Kiram, ang anak ng Sultan ng Sulu nang humarap ito sa PRO-MEDIA News Forum noong Martes sa Quezon City kaugnay sa umano’y pagpapalayas sa kanila ng Malaysian Government sa lupain ng Sabah na pag-aari ng Pilipinas.
Bagamat napakasimple ng suot ay mababanaag mo sa hitsura, pananalita at pagsagot ang pagiging Prinsesa ng anak ni Sultan Jamalul Kiram lll, ang Sultan ng Sulu na si Princess Jacel Kiram.
Noong nakaraang Linggo ay nagtungo sa Sabah ang tiyuhin ng Prinsesa na si Datu Raja Agbimuddin Kiram at ang may 200 katao na mula sa Sultanate of Sulu para protektahan ang Sabah ng tangkain ng Malaysian Govern-ment na paalisin ang mga Filipinong nakatira rito.
Nakalulungkot isipin na ang gobyerno ni Pangulong Noynoy ay mistulang nagbubulag-bulagan at nagbibingi-bingihan sa ginagawa ng Malaysian government na panggigipit sa Sultanate of Sulu.
SA talakayan na ginangap sa Quezon City Sports Club, E. Rod-riguez Ave. sa Quezon City, naging panauhin si Princess Jacel Kiram, at matapang nitong sinabi na pumunta ang kanyang tiyuhin at mga tao ng Sultanate of Sulu sa Sabah para protektahan ang mga Filipinong nakatira roon na pinalalayas ng Malaysia.
Sinabi raw ng Malaysia na aarestuhin nila si Datu Raja Agbimuddin Kiram at mga kasama nito kapag hindi umalis.
Ayon sa Prinsesa, pumunta ang kanyang tiyuhin at mga tao ng Sultanate of Sulu sa Sabah para ayusin ang anomang problema na mayroon dito at kung sakaling aarestuhin ng Malaysia ang mga ito ay lalaban sila hanggang sa kahuli-hulihang hininga.
Hangga’t maaari ay ayaw ng pamilya Kiram na dumanak ang dugo sa pagbawi sa Sabah kaya nagpadala ng sulat ang Sultanate of Sulu sa Prime Minister ng Malaysia na bukas sila sa pakikipag talakayan anomang oras.
Ang laban ng Sultanate of Sulu ay hindi lang sa pamilya Kiram kundi laban din ng mga Filipino dahil ang Sabah ay pag-aari ng bansang Pilipinas.
Alam ng Malaysia na hindi nila pag-aari ang Sabah o North Borneo dahil ayon kay Prinsesa Jacel, umuupa sa Sultanate of Sulu ang Malaysia ng 5,300 Ringgit o more or less P60,000 kada taon.
Bago matapos ang aming kuwentuhan ni Prinsesa Jacel ay pakumbaba nitong sinabi na anomang tulong na maibibigay ng sinoman para mabawi ng Sulta-nate of Sulu ang Sabah ay taos-puso nila itong pasasalamatan.