BILIB naman ako sa tibay ng ‘buriki ng soya beans’ nitong si Gisting ng Pulilan sa Bulacan.
Kung titingnan mo ang paburiki ng soya beans ni Gisting ay iisipin mong ito’y piya-it-piya-it lang.
Pero ‘wag ka, ‘di ito small time dahil ang operasyon na ginagawa ni Gisting ay 24 hours at halos hindi na nga natutulog ang mga bataan niya sa pagbuburiki sa soya beans.
Mantakin n’yo, sa pagbuburiki lang ng soya beans ni Gisting ay umaabot na sa milyong piso ang nakukulimbat niya araw-araw.
Ginagawa ng grupo ni Gisting na front ang parking area sa likod ng Shakey’s sa harap ng canteen upang makaparada ang mga truck at kunwari ay kakain ang mga truck driver sa canteen.
Habang kumakain ang mga driver ng truck, ang grupo o mga bata naman ni Gisting ay isa-isa nang binuburiki ang mga sako-sakong soya beans na karga ng mga truck.
Ang modus operandi ni Gisting ay ganito: habang tumatakbo pa lang sa NLEX ang mga cargo truck ng soya beans ay isa-isa nang kinokontak ni Gisting sa cellphone ang mga driver para maisaayos ang negosasyon sa presyo ng pagbuburiki.
Ang nagsisilbing kontak ni Gisting sa operasyon na ito ay ang mga kapwa nitong buriki operator na sina Tolits ng Porac at alyas Tibay ng Malaganag, Pampanga.
BOOKIES, BOOKIES, BOOKIES SA MAYNILA
Sa Maynila naman ay patuloy ang operasyon ng bookies ng karera ni Jeff Concepcion na may codename noon na Jeff/Mia.
Ngayon, Lagalag na ang codename. Nagsimulang mag-operate ng bookies ng karera si Jeff sa ilang piraso lang sa Tondo.
Pero ngayon ay halos kadikit na nito ang lahat ng mga malalaking operator sa Maynila. Pati sa Sta Ana, Malate, Sampaloc at Binondo ay napasok na rin niya.
***
Anomang reklamo o puna ay i-text lang sa 09189274764, 09266719269 o i-email juandesabog@yahoo.com. JUAN DE SABOG/JOHNNY MAGALONA
