NOONG Setyembre 2013, umabot sa 38 na personalidad ang sinampahan ng Department of Justice (DOJ) ng kasong graft and corruption na may kinalaman sa ‘pork barrel’ o Priority Development Assistance Fund (PDAF). Kasama sa 38 sina Juan Ponce Enrile, Jinggoy Estrada, Ramon “Bong” Revilla, Jr., at Janet Napoles.
Ang mga kasong kriminal nila ay patuloy na dinirinig ng Sandiganbayan dahil isinampa na ng Office of the Ombudsman sa nasabing korte.
Pagsapit ng Nobyembre 2013, kinasuhan ng DOJ si Ruffy Biazon (na noon ay hepe ng Bureau of Customs) at 33 pang personalidad hinggil pa rin sa PDAF.
Ngunit, 2015 na ngayon ay hindi pa isinasampa ng Office of the Ombudsman sa Sandiganbayan ang kaso ni Biazon at 33 pa.
Si Biazon ay kasalukuyang opisyal ng Government Service and Insurance System (GSIS).
Mayo 2015 na ngayon, ang sinasabing PDAF 3rd Batch ay hindi pa ipinag-uutos ni DOJ Secretary Leila de Lima.
Ayaw sabihin ni De Lima kung sino-sino ang kasama sa PDAF 3rd Batch, ngunit alam na alam na ng media dahil hindi naman pahuhuli ang media sa pag-alam sa mga masasamang loob sa pamahalaan.
Ayon sa source, ang kasama raw na kakasuhan ng graft and corruption ay sina Senador Gregorio Honasan, Technical Education and Skills Development Authority (TESDA) Director General Joel Villanueva, Cagayan De Oro Representative Rufus Rodriguez, La Union Representative Victor Ortega, ABONO Party-list Rep. Conrado Estrella III, at dating Pangasinan Rep. Rachel Arenas.
Ang P35-milyong PDAF ni Arenas ay hindi umano inilaan sa kanyang distrito.
Nangangahulugang iba ang nakinabang.
Karamihan sa PDAF 3rd Batch ay makakasama ni De Lima sa senatorial slate ng Liberal Party-Mar Roxas Wing (LP-Roxas Wing). Hindi maganda ang ipinakikita ni De Lima.
Pangulong Benigno Aquino III, utusan mo na si Sec. De Lima na isampa ang mga kasong graft and corruption laban sa PDAF 3rd Batch upang malaman ng publiko na ang “Daang Matuwid” ay wala pa lang kinikilingan at pinaliligtas na mga magnanakaw sa pamahalaan.
***
Problema at reaksyon n’yo, itawag sa: 09985650271, o mag-email sa: akosibadilla@yahoo.com BADILLA NGAYON/NELSON BADILLA
