ANG 4A ay isang rehiyon na maituturing na ‘problem area’ ng PNP dahil sa dami ng lawbreaker sa bahaging ito ng bansa.
Krimen dito, krimen doon – ‘yan ang malungkot na katotohanan na ‘di natugunan ng mga regional commander na naitalaga rito.
Ngayon ay may bago na namang director ang rehiyon na kilala rin sa tawag na Calabarzon area sa katauhan ni C/Supt. Richard Albano.
Sa pagkakatalaga kamakailan ni Sec. Mar Roxas kay Gen. Albano bilang R4A, tiyak na titino ang mga ‘halang ang kaluluwa’ riyan sa rehiyon.
Si Gen. Albano ay isa sa tinatawag na ‘The best of the Best’ ng PNP dahil sa rami ng mga naresolbang malalaking krimen.
Sinasabi ko ang lahat ng ito dahil ako’y saksi sa maningning na career ng heneral mula pa nang siya’y batang police lieutenant sa Bulacan.
Kaya nga kung tawagin ko siya’y si ‘Nero Wolfe’, ang magaling na fiction police detective sa bansa ni uncle Sam.
Kumbaga sa pelikula, blockbuster ang police career ng heneral dahil sa matagumpay na pakikipagtunggali sa mga kriminal.
Siya’y masasabi kong ‘ruthless’ sa mga halang ang kaluluwa, subalit malambot ang puso sa kumikilala sa kahalagaan ng buhay.
Parang nakikinita ko nang gugulong ang ulo ng ilang provincial commander at city at town chiefs diyan sa area ng Calabarzon.
Tiyak na masisibak ang tamad at may sapak sa ulong mga commander na pakuya-kuyakoy lang sa kanilang mga opisina.
Kaya payo natin sa limang PD sa rehiyon, aba’y magpakitang-gilas kayo kay ‘Nero Wolfe’ para kayo’y ‘di masibak sa puwesto.
Ang tip natin, galit si general sa droga kaya kayong mga pulis na kumukunsinti sa mga pusher at adik, maghunos-dili na kayo.
Walang sinasanto si Gen. Banong, awtoridad man o mga drug peddler at user, siguradong kayo’y may paglalagyan.
Basahin n’yo ang libro ni Rex Stout, ang may-akda ng exploit ni ‘Nero Wolfe.’
‘Yan ang bagong police director ng R4A.
Pramis! CHOKEPOINT/BONG PADUA