DAMANG-DAMA na [raw] ngayon ng mga bumbero ang simoy ng Kapaskuhan sa buwan pa lamang ng Hulyo.
Ito’y dahil sa pagpapatupad ng Fire Safety Inspection Certificate o FSIC na binasbasan ng kunsintidor na si Mr. Abnoy mula nang mangyari ang trahedya sa pabrika ng Kentex.
Kapag walang FSIC, walang business permit. Kapag nagmatigas ang mga alkalde sa pagbibigay ng business permit sa mga negosyo na wala pang FSIC ay malalagot sila kay Abnoy.
Ewan ko ba kung sino naman sa mga asong ulol ni Abnoy ang nagrekomenda sa polisiya na ito samantalang kapus-palad sa mga tauhan ang Bureau of Fire Protection (BFP).
Sa Valenzuela City na lamang, halimbawa… nagmamatigas sila sa FSIC bago ang business permit. O, ngayon na pumayag ang alkalde roon… ang mga bumbero ngayon ang puputukan ng reklamo.
Ibang klase rin naman ang eksena sa Quezon City na mayroong mahigit 60,000 negosyo. Bayad ka muna para sa FSIC bago ang business permit pero wala naman inspeksiyon. Ay taran..
Garantisabog! Mauuwi sa ‘Christmas Carolling’ ang ating bumbero dahil sa palintek na FSIC na iyan. Tiba-tiba si Hesus na anak ni Fernando sa Quezon City maging ang kanyang mga asong ulol sa kanyang bakuran.
Minamantak ba naman ninyo na maging ang mga maliliit na negosyante tulad ng Sari-Sari Store at karinderya ay aawitan ng mga bumbero upang makakuha lang ng business permit.
Marami na ang umiiyak na negosyante dahil sobra na ang antala ng kanilang business permit sanhi ng kahambugan at kasuwapangan [daw] ng bumbero. Piyaet na lang, niyayari pa ng mga mokong na ito!
Ang totoo niyan, kapag ipatupad natin ng tunay ang Fire Code ng bansa aba’y kahit Malakanyang ay lagapak dito. Kahit mga tanggapan ng gobyerno ay salto sa batas patungkol sa kaligtasan sa sunog.
Kahit Punong Tanggapan ng BFP ay lalagapak sa batas na ito pero nag-iinarte ang mga ito na animo’y maging sila ay nakasusunod sa mga regulasyon patungkol sa insidente ng sunog.
***
Para sa komento o suhestyon: eksperto71@gmail.com EKSPERTO/JOIE O. SINOCRUZ, Ph.D.
