DAHIL nahulog nang husto ang kanilang “heart” kaya maraming matitikas na lalaki ang nahulog sa kapahamakan. Sa Biblia ay nasusulat na kaya sumuway sa Diyos si Adan ay dahilan kay Eba. Si Mark Anthony, sa sobrang pag-ibig ay sumabay kaya kay Cleopatra sa pagpapatiwakal. Si Samson, kaya naglaho ang “sobrang lakas” dahil isiniwalat ang kanyang sikreto sa minamahal na si Delilah!
En so-un, en so-port!
Inilatag natin, parekoy, ang mga paalalang ito upang mabigyang babala ang magiting na si Sen. Chiz Escudero! Sa ngayon kasi ay maigting ang mga patutsada sa kanya ng mag-asawang Ongpauco, ang mga magulang ng seksing si Heart Evangelista!
Palagi ka pa namang nasa “top” ng bawat survey sa mga posibleng mananalo (uli) sa pagka-senador sa May elections! Na kung hindi mo iingatan ang iyong relasyon kay Heart ay posibleng ito rin ang tatapos sa iyong magandang career!
On the other hand, pag pinakinggan naman natin ang pahayag ng mga Ongpauco ay mukhang si Heart naman ang gusto nilang ilayo kay Chiz sa takot na mawasak ang kinabukasan ng dalaga. Kesyo lasenggo, wala sa hulog at may kakaibang “attitude” si Sen. Chiz Escudero!
Anoman ang tunay na kaganapan sa Chiz-Heart issue, isang bagay lang ang tiyak. Kung magpapatuloy ang iringan na ito, kung hindi si Heart ang masisira kay Chiz ay si Sen. Chiz ang sisirain ng kanyang “heart.”
Pero kung iisiping mabuti, paano ko ipangangalandakan na aayusin ko ang malalaking problema ng bansa? Paano ko ipagsisigawan na aayusin ko ang mga suliranin ng aking mga kababayan? Kung ang mismong relasyon ko sa aking mga biyenan (kahit hilaw) ay hindi ko magawang ayusin? Kung talagang mahal ko si Heart ay dapat mahalin ko rin ang kanyang mga mahal!
Ang tanging dahilan, parekoy, na hindi ko kayang magsakripisyo ng ilang bagay kesehodang magbanggaan kami at ng mga mahal ni Heart. Ay kung hindi ko naman talaga mahal si Heart, at kaya hindi ko siya kayang bitawan dahil ginagamit ko lang siya!
Napakagulo na nga ng pulitika ay nahaluan pa ng buhay “showbiz.” Ano senador, nasa heart mo ba talaga si Heart o ginagamit mo lang sa iyong pulitika? Kung hindi, eh, ipaubaya mo na lang sa akin, este, sa kanyang mga magulang pala! Hak, hak, hak!!
May iba pa pong ganitong kuwento bukas, BOC Commissioner Ruffy Biazon!