MARAMI ang nagtataka kung bakit mas maraming kandidato sa pagka-bise-presidente kaysa pagka-pangulo.
May mga nangangamba nga na baka hindi matapos ng susunod na presidente ang kanyang termino.
Si Grace Poe ay kandidato sa pagka-presidente ngunit baka ma-disqualify siya dahil sa issue ng natural-born citizen.
Bukod doon ay may pagtatalo rin kung sapat ba ang kanyang residency buhat noong bumalik siya sa Pilipinas nang mamatay ang ama niyang si Fernando Poe, Jr.
Lamang sa lahat ng mga kandidato for president si Poe sa ratings kaya natural lamang na pukulin at asintahin siya ng mga nagnanais na manalo sa pagka-bise-presidente.
Siya ay parang isang hinog na prutas na ninanais masungkit ng mga takam na takam na makain ito.
At ‘di malayong siya ang manalo sa paligsahang ito sa pagka-presidente. Ang problem lang ay baka ma-declare ng Korte Suprema na null and void ang kanyang pagka-Pangulo.
Walang problema kung manalo rin si Chiz Escudero na kanyang ka-tandem, ngunit paano kung ang manalong bise ay si Sonny Trillanes o si Leni Robredo o si Bongbong Marcos o si Gringo Honnasan o si Alan Cayetano?
‘Yan ang dahilan kung bakit marami ang gustong maging vice president dahil ‘pag natanggal si Grace ay tiyak na isa na sa kanila ang susunod na president ng ating republika.
Suwerte si Chiz kung si Grace ay matanggal matapos manalo dahil tiyak na si Chiz na ang susunod na presidente.
Matagal na itong ambisyon ni Chiz at ito na ang tamang panahon para sa kanya. ‘Yan ay kung sakaling manalo nga sa pagka-bise si Chiz.
Ang problema ay maraming kalaban si Chiz sa posisyon na ito. May tatlo pang kandidato sa pagka-bise na kapwa Bikolano. Sila nga ay sina Robredo, Honasan at Trillanes.
Magkakawatak-watak ang mga Bikolano at malamang na matalo silang lahat.
Si Bongbong ay may solid Ilocano bloc, na tiyak na susuportahan din ng mga taga-Leyte. DEEP FRIED/RAUL VALINO
