SA naunang artikulo ay nabanggit natin ang mga dapat gawin kaagad ng bagong pangulo. Malawakang imprastraktura tulad ng kalsada, tulay, ospital, paaralan, malawakang programa ng industriyalisasyon at gawin na makabago ang gamit ng mga magsasaka.
Kapag naisagawa iyan sa unang bugso pa lamang ng taon sa kanyang pamamahala, walang duda, lahat halos ng Filipino ay magkakatrabaho at hindi na mangangarap na mandayuhan pa. Ang bawat magulang, maipadadala na ang mga anak sa eskwela at malulutas ang kamangmangan.
Ipagbawal ng bagong PRESIDENTE NG PILIPINAS ang pakikialam ng mga mambabatas sa bawat proyekto. Kapag nagpumilit silang mga politiko, tanggalin kaagad sa puwesto at kasuhan, ipakulong habambuhay.
Bigyang-laya ang mga lokal na lider ng mga lalawigan, lungsod at bayan ang paggawa ng sariling programa ngunit kailangan hindi lamang ang kanilang sanggunian ang makaaalam kundi isama ang bawat sektor ng mamamayan sa bawat partikular na proyekto.
Bago dumating sa Malacañang si Ferdinand Marcos, may kumpitensya ang mga gobernador at alkalde noon. Kanya-kanyang patayo ng eskwelahan, ospital at pati sa kaayusan ng kanilang nasasakupan. Malaya sila pero nang lumala ang pangarap ng diktador, tinuruan ang mga LGUs na sumuso sa Malacañang.
Dapat, ang susunod na PRESIDENTE NG PILIPINAS ay may sariling DISIPLINA NG KAAYUSAN AT KATATAGAN. ‘Yung hindi mangingiming pagsabihan ang mga kupal at epal na politiko. Kung matigas ang ulo, kasuhan, tanggalin sa puwesto at ipakulong!
Dapat ay bigyan ng MAMAMAYAN ng solidong suporta ang susunod na PRESIDENTE NG PILIPINAS. Huwag tayong sumakay sa mga maangal at maangas na politiko. ‘Yun bang tatakutin pa ng impeachment o kakasuhan ng human rights violations ang MATINONG PRESIDENTE NG PILIPINAS.
Magagawa iyan ng isang Pangulo kung tayong mamamayan ay titindig sa kanyang tabi. Marahas man ang estilo kung mababago naman niya ang bulok na sistemang pulitikal, samahan natin ang makagagawa ng mga iyan.
Dapat ay bigyan ng unang atensyon ang paglutas sa trapiko. Magagawa ito kapag ibubuhos niya ang paggawa ng malawak at maramihang perokaril o serbisyo ng tren. Kung ako nga lang ang masusunod, ibibigay ko lahat ang proyektong iyan sa mga kontraktor na Hapones!
Ipahukay lahat ang mga sapa at ilog laluna ang Pasig River at Laguna De Bay. Walang duda, mareresolba ang baha sa Metro Manila at mga kalapit lalawigan at bayan. Gumawa ng water catch basin sa Candaba Swamp para hindi tayo mawalan ng tubig kahit tag-araw.
Ilan lang uli ito. Marami pa tayong idaragdag. Hindi baleng mabaon tayo sa utang pero nakikita ng sambayanan kung saan napupunta ang pera. Hindi tulad ngayon, nganga na, wala pa! BALETODO/ED VERZOLA
