ANG akala ko, kapag napalitan na ang station commander ng Presinto 7 (Jose Abad Santos Precinct) ay matitigil na ang pangongotong ng mga pulis na nakatalaga sa nasabing presinto.
Aba, sa halip daw na mahinto, mas lalo pang lumala ang mga kotongerong pulis sa ginagawa nilang pangongotong sa mga bumibiyaheng motorista.
Basahin natin ang text message ng isa sa mga nabiktima ng mga kotong pulis.
Sir Magalona, ipaalam ko lang sa inyo na isa ako sa mga biktima ng pangongotong sa Abad Santos cor. Yuseco, dakong 2:40 ng madaling-araw ng dalawang pulis na sina PO3 Reyes at PO3 Calvario.
Ang modus ng dalawang kotongerong pulis na ito ay paparahin kayo sa gitna ng kalsada tapos sasabihin sa inyo na beating the red light kayo kahit hindi naman po.
Pagkatapos ay tatakutin kayo na titikitan at sasabihin magbigay ka na lamang ng P200 para hindi ka matikitan.
Grabe talaga ang mga pulis na ito, maging ang mga naka-motor na kumpleto naman ang papel ay hinahanapan nila ng mga violation.
‘Pag may nasilip sila o kaya naimbentong violations para pagkukuwartahan o kaya, tatakutin nila ang mga ito na kanilang ikukulong ‘pag ‘di nagbigay ng P300 to P500 para maayos.
Sana, Sir Magalona, ay matanggal ang mga ganyang pulis dahil sila ‘yung mga kalawang sa pulisya.
SI COL. RAMIREZ ANG SANGKALAN SA VK
Walang takot at buong tapang na ino-operate pa rin ni Jun Mata ang sandamukal na mga video-karera nito sa Taytay.
Ang matindi rito, palaging binabanggit ni Jun Mata tuwing siya ay huhuliin ng mga pulis na nakadirekta ang “timbre” niya kay Taytay chief-of-police Supt. Elpidio Ramirez.
Totoo ba ito hepe?
Mukhang ginagamit ang pangalan ninyo ni Jun Mata!
o0o
Anomang reklamo o puna ay i-text lang sa 09189274764, 09266719269 o i-email juandesabog@yahoo.com. JUAN DE SABOG/JOHNNY MAGALONA
