TILA nasopla ng opinyon ng abogado de kampanilya na si Atty. Romulo Macalintal ang lahat ng mga naghain ng kasong diskuwalipikasyon laban kay Sen. Grace Poe.
Ayon kasi kay Macalintal, walang mga “K” as in karapatan itong sina Atty. Estrella “Star” Elamparo, dating Sen. Francisco “Kit” Tatad, ang talunang si Rizalito David at maging si dating University of the East Law Dean Amado Valdez para kasuhan si Poe dahil sa unang-una ay wala silang “legal status” gaya nang sinasabi ng batas.
Sa paliwanag ni Macalintal, hindi naman “real-party-in-interest” ang apat na nagkakandarapa at ipinagpipilitang maligwak ang kandidatura ni Poe, (Aba biruin ninyo kung mananalo si Poe bilang Presidente ay siya lang ang kauna-unahan sa kasaysayan na pulot (foundling) o ampon na Presidente ng bansa o maging sa Timog-Silangang Asya tanging si Poe lang ang naging presidente.
Ang sabi pa ni Macalintal ay limitado raw ang reklamo nina Elamparo, et al., sa pag-impluwensya sa Commission on Elections (Comelec) na tsugihin sa listahan ng mga kakandidato sa pagka-Pangulo, bilang mga rehistradong botante.
Gayunman, nilinaw ng abogado na hindi naman makikinabang o manganganib sina Elamparo et al. sakali mang matanggal o manatili sa balota si Poe.
Tingnan ninyo, ang sabi pa ng abogado, bukod sa hindi naman “real-party-in-interest,” kwestyunable rin ang naging katwiran ng mga ito sa paghahain ng kaso laban kay Poe.
E, halatang-halatang ‘buking’ ang kaugnayan ni Elamparo sa Liberal Party at maging ang kaugnayan nina Rizalito David at dati niyang boss na si Kit Tatad, at ni Dean Valdez sa United Nationalist Alliance (UNA), ang partido ni Vice President Jejomar Binay. Hehehe.
Kaya nga may kasabihan sa pulitika, ang pagkakaibigan at pagiging magkaalyado ay higit pa minsan sa pagiging magkapatid o magkamag-anak.
Kaya nga mas nanaig ang interes, ekonomiko man o pulitikal, na kalimitan ang gamit ay ang mga kaalyado para lang sa sinusuportahan nilang partido o kandidato.
Ika nga ni Macalintal, binibigyan din naman ng “benefit of the doubt” sina Elamparo et al.
Baka raw kasi totoong makabayan ang mga ito na gusto lang nilang protektahan ang interes ng publiko kaya nagkukumahog sila at ginawa pang patong-patong ang kaso na mawala sa listahan ng kakandidatong presidente ang isang pulot at ampon.
SUGALAN SA LIPA, NAKABUBULAG AT NAKABIBINGI
Ay naku (Onyok), sa Lipa sa lalawigan ng Batangas doon sa Bgy. Pulo at Bgy. Banya-banay ay grabe ang operasyon ng peryahan na puno ng iligal na pasugalan ni Jhun na asawa ni Glena.
Napakalakas gabi-gabi ang sugalan dito at bulag at bingi sina mayor at hepe.
***
Anomang puna o reklamo i-text sa 09169274764,09266719269, o i-email sa juandesabog@yahoo.com JUAN DE SABOG/JOHNNY MAGALONA