IPAGPATULOY natin ang pagtalakay sa tila magandang pangangasiwa ng Manila Department of Social Welfare sa Marikina City at kung bakit dapat na umanong sibakin ni Mayor Erap ang pinuno nito na si Dr. Arnold Pangan.
May mga insidente rin daw ng mga pagtakas ng mga kabataan mula sa center dahil hindi na raw makayanan ang mga nangyayari sa loob katulad na madalas na riot at away ng mga gang sa loob.
Kaya naman pala nakikipaghabulan at lumalaban ang mga pamilyang nakatira sa lansangan kapag nire-rescue sila ng Manila City Hall dahil ayaw nila roon sa pinagdadalhan sa kanila.
Isa sa mga problema umano ang mga panis na ipinakakain sa kanila at mistulang mga preso kung sila’y tratuhin at ito ang dahilan kaya paulit-ulit silang tumatakas at bumabalik sa lansangan.
Ang mga hinaing ng mga taong lansangan ay patunay lang na hindi maayos ang pamamalakad ng mga namumuno rito.
Depensa naman ng MDSW ay pamumulitika lang daw ito at nagagalit ang pamunuan ng Boystown kung bakit nakalabas sa media ang insidente.
Bakit at ano naman kaya pumasok sa kukote ng mga taga-MDSW kung paano ito napasok sa pulitika at paano magiging bahagi ng pulitika ang pagkakalason at pagkamatay ng bata at bakit nila gustong itago sa media ang insidente? Anong mayroon?
Ngayong pumasok na sa eksena ang Commission on Human Rights para imbestigahan ang nangyari, masasabi pa rin ba nilang pulitika lang ang lahat?
Ipinagpasalamat naman ito ng ilang konsehal ng lungsod ng Maynila sa pagsasabing dapat daw gawin ang nararapat at kung kinakailangang managot ang pamunuan ng MDSW dahil sa kapabayaan ay dapat na bigyan-pansin ito ni Mayor Erap dahil kapakanan ito ng mga kapus-palad na inilikas nila at dinala sa Boystown.
Mabuti nang CHR ang mag-imbestiga rito dahil kung pararaanin ang imbestigasyon sa City Council ay wala ring mangyayari, lalo na ngayon na busy ang mga ito sa kanilang pangangampanya.
oOo
Bukas po ang Lily’s Files para sa inyong mga reklamo, suhestyon at komento, mag-text lang po sa 09219787042. LILY’S FILES/LILY REYES
