ANG dating tinitingala at pinagkakatiwalaang ahensiya ng pamahalaan pagdating sa paghuli ng mga kriminal at pagresolba ng mga kaso, ngayo’y tanggapan na raw ng mga tanga at pulpol na law enforcer.
Ang tinutukoy ko ay itong dating prestihiyosong National Bureau of Investigation na nasa ilalim ng Department of Justice. Pero ngayon ay tila hindi na, dahil wala na itong nareresolbang mga kaso lately at puro illegal gambling na lang ang inaatupag na hulihin.
Biyernes ng gabi nang lusubin ng sandamakmak na agents ng NBI-NCR Division na naka-full battle gear at bullet proof vests pa ang isang cockfighting arena sa Mabalacat, Pampanga.
Ayon sa aking impormante, hinuli ng mga kolokoy na agents, sa pangungunga ng isang Agent Rommel Ramirez, ang ilang mga kumukuha ng video ng sabong doon.
Ang sabi raw ni Ramirez, sangkot silang lahat sa illegal gambling sa internet pero hindi niya maipaliwanag kung paano. Si Ramirez ay minsan ng na-relieve noon dahil sa isang kwestiyunableng operation na nauwi lang umano sa aregluhan.
Ayon sa anti-cybercrime law, hindi bawal ang pagkuha ng video ng anomang sporting event at pagpapalabas nito o ‘yung tinatawag na “live streaming” basta’t ito ay for entertainment purposes lang sa internet.
Alam ni Ramirez at ang boss niya na si Atty. Max Salvador na madidismis lang ang kaso sa Korte dahil wala silang matibay na ebidensiya, dagdag pa ng aking espiya sa loob ng NBI. Pero nakapagtataka raw na pinagpipilitan ng dalawa na may krimen o kaso ang mga kumukuha ng video ng mga oras na iyon. Malamang daw na kung hindi lasing marahil ay bangag ang agents na ito.
Hindi pa rin malinaw kasi ang implementing rules and regulation o IRR ng cybercrime law kaya kadalasan nadidismis lang ang kaso pagdating sa illegal activities sa cyber space.
Ang masaklap, nagagamit ng ilang law enforcement agency ang batas na ito para mangotong. Kung papaano, ’yan ang ating tatalakayin sa susunod na edisyon.
Sa pagpasok ng bagong gobyerno sa July 1, dapat ay balasahin ng bagong Pangulo ang buong NBI at alisin ang mga pulpol na mga agent tulad ni Ramirez at maging mga opisyal gaya ni Salvador na bopol para muling manumbalik ang tiwala ng mga tao sa ahensiya.
Sayang itong NBI. DEADSHOT/ERWIN TULFO
