DAPAT nang sumailalim sa imbestigasyon ng Office of the Ombudsman itong dating kongresista na si Vincent ‘Bingbong’ Crisologo kaugnay sa kanyang kwestyunableng paglustay ng kanyang Priority Development Assistance Fund, kasabay ng pagkuwestyon ng Alliance of Good Governance sa umano’y kawalan ng aksyon ng Department of Justice hinggil sa iba pang personalidad na sangkot sa Napoles Pork Barrel Scam.
Ayon sa AGG, karamihan sa mga sangkot sa pork barrel scam ay tumatakbo pa ngayon sa halalan na isang hindi magandang batayan at nagpapamalas lang na ang kampanya ng pamahalaan sa pagsugpo sa katiwalian ay pili lang at nananatili pa ring ligtas sa kaparusahan ang ilan.
Isinahalimbawa ng AGG si Crisologo na tumatakbo bilang kinatawan sa Kongreso ng unang distrito ng Quezon City na hindi man lang naipatawag kaugnay sa kuwestyunableng paglustay ng kanyang PDAF noong siya pa ang kinatawan sa Kongreso mula taong 2004 hanggang 2013.
Ibinatay ng grupo ang akusasyon sa ulat ng Commission on Audit na nakatala ang pangalan ni Crisologo sa mga kongresistang may kwestyunableng paglustay sa mga proyektong pinondohan ng kanyang PDAF at ipinaraan sa non-goverment organizations ni Janet Lim-Napoles. GOOD RIDDANCE/ARLIE CALALO
