ANG mamamayang Filipino ang nagwagi sa pagkakapanalo ni President-elect Digong Duterte.
Ito ang ating nakikita sa Duterte presidency dahil prayoridad ni Pangulong Digong ang bigyan ng magandang buhay na may katahimikan ang mga mamamayan ng ‘Pinas.
Bagaman mahirap ang maging Pangulo ng estado dahil sa rami ng problemang ipamamana sa kanya ni PNoy, magiging madali lahat ito kay Pangulong Duterte kung atin siyang dadamayan at susuportahan.
Pagkakaisa at pagtutulungan ang susi sa tagumpay para sa isang mapayapa at maunlad na Pilipinas, at iyan ngayon ang dapat nating gawing lahat bilang mga taong umaasa at naghahangad ng pagbabago.
Tama ang unang hakbang ni Duterte na manawagan nang pagkakaisa at pagtutulungan sa lahat kaya nakikita nating maganda ang hinaharap ng bansa kay Digong.
Healing ang panawagan ni Duterte sa lahat at iyan ang dapat gawin ng mga lider ng LP, UNA at grupo ni Grace Poe sa kanilang mga tagasunod dahil sila ang pinuno ng mga ito.
Naniniwala tayong puso ang mananaig sa Duterte presidency at iyan naman ang tama dahil ang Pilipinas ay uhaw at sabik na sa lider na may puso pero may tapang dahil ito ang kailangan ng bansa sa ngayon.
Sawa na ang tao sa mga trapo kaya panahon na ngayon ng isang lider na puno ng aksyon pero may malasakit sa masang Filipino.
Maraming problema ang ‘Pinas ngayon pero dahil magtutulungan tayong lahat, hindi imposibleng magtagumpay si Digong sa labang ito, dahil tayo ang kanyang lakas. ALINGAWNGAW/ALVIN FELICIANO
