MALAPIT nang magwakas ang patuloy na paninira ng mga nagmimina sa ating kalikasan dahil na rin sa kautusan ni Pangulong Rodrigo Duterte na kakalusin ang mga abusado at balasubas na minero sa lahat ng panig ng ating bansa.
Matatandaang kamakailan ay ipinag-utos ni Duterte kay Department of Environment and Natural Resources (DENR) Sec. Gina Lopez na muling siyasatin ang permit ng lahat ng minahan sa Pilipinas.
Sakali mang may makitang paglabag ay hindi mangingimi ang DENR na ipasara ang mga ito, lalo na iyong mga sumisira sa ating likas na yaman at walang habas sa pagkuha ng mina kapalit ng malaking halaga ng salapi.
Bukod dito, pinasisilip din ni Pangulong Digong kung tama ba ang ibinabayad na buwis ng mga nagmimina dahil may ilang minero ang hindi nagdedeklara ng kanilang totoong kinita sa kanilang pagmimina.
May mungkahi rin na alamin kung tama ba ang kinuhang permit ng mga nagmimina dahil ang iba sa mga ito ay small scale mining permit lamang ang kinuha pero kung titignang mabuti ay mas marami pa sa dapat na mina ang kinukuha ng mga ito.
Ang kautusan na ito ni Duterte ay bilang tugon na rin sa panawagan na pangangalaga sa kalikasan dahil na rin sa iba’t ibang trahedya na nararanasan ng bansa dahil sa pagkasira ng ating kapaligiran.
Marami kasi sa mga nagmimina sa ating bansa ang walang pakundangan kung paano sirain ang kabundukan makakuha lamang sila ng kanilang hinahanap na mina at magkamal ng malaking halaga ng salapi.
Kahit na may batas na umiiral sa ating bansa tungkol sa pagmimina ay hindi naman ito sinusunod ng ilang ganid sa malaking kikitain.
Kung ipatutupad nang maayos ang batas na ito ay tiyak na mapangangalagaan natin ang ating kalikasan para naman may maabutan pang magagandang tanawin ang susunod na salinlahi.
Hangad nating maging matagumpay ang kampanya ni Secretary Lopez sa pangangalaga sa kalikasan at nawa’y masampahan nito ng kaukulang kaso ang mga mapatutunayang lumalabag sa umiiral na batas. ALINGAWNGAW/ALVIN FELICIANO
