MISINTERPRETED o mali ang pagkaka-interpret ni Indonesian President Joko Widodo sa mga sinabi ni Pang. Rodrigo Roa Duterte na hindi siya makikialam sa desisyon ng korte ng Indonesia hinggil sa sitwasyon ng kaso ng Pinay na si Mary Jane Veloso.
Ayon kay Presidential Communication Office Sen. Martin Andanar na malinaw raw ang sinabi ni Pang. Duterte na kanyang rerespetuhin ang batas ng Indonesia at wala nang ano pang sinabi ang Pangulo na nagbigay ito ng go-signal na ituloy ang firing squad kay Veloso.
Sa naging ulat kasi ng Jakarta Post na binigyan daw ni Duterte si Pres.Widodo ng go-signal na ituloy ang hatol na bitay kay Veloso ay isang napakalaking kabalintunaan naman sa mga naging pahayag ng Pangulo.
Ayon pa sa Malacañang, sa kasalukuyan ay indefinitely suspended daw ang implementasyon ng hatol kay Veloso dahil mayroon pang kaso o kinasuhan sa Pilipinas na recruiter nito.
Katunayan, siniguro na ni Presidential Spokesperson Ernie Abella na naglatag na sila ng anim na puntos para sa paglilinaw sa usaping Mary Jane Veloso.
Sinabi pa ni Abella na bago pa man daw bumisita si Pang. Duterte noong naka-raang linggo sa Indonesia ay indefinitely deferred ang pagbitay kay Veloso dahil pumayag daw ang Indonesia na tumayong testigo si Veloso laban sa kanyang recruiter sa Pilipinas.
Kung inyong matatandaan, si Veloso ay nakakulong simula pa noong 2010 matapos na mahulihan ng heroin (na nagkakahalaga ng US$500,000) na nakatago sa kanyang maleta na ipinahiram ng kanyang recruiter na si Ma. Cristina Serio.
‘DI MAGIBA DAHIL SA MAGALING MAGLANGIS
Halos tatlong sikat na siyudad sa Metro Manila: ang San Juan, Pasig at Mandaluyong ang lawak ng operasyon ng illegal lotteng ng mag-asawang Cris at Rose habang abala naman ang mga kapulisan sa pagtugis sa mga drug pusher at drug user.
Patuloy na namamayagpag ang pasugalan ng mag-asawang ito.
Magaling maglangis sa mga kapulisan at sa lokal na pamahalaan ng Metro Manila kaya untouchable ang illegal gambling nito.
***
Anomang puna o reklamo, i-text sa 09189274764, 09266719269 o i-email sa juandesabog@yahoo.com. JUAN DE SABOG/JOHNNY MAGALONA
