ANG mga raid sa Culiat, Quezon City ay maituturing na pinakamala–king operasyon ng Quezon City Police District (QCPD) laban sa iligal na droga.
Nabuwag ng QCPD, sa pamumuno ni District Director S/Supt. Guillermo Eleazar, ang sindikato sa droga rito.
Sa report ni Eleazar kay NCRPO chief Gen.Oscar Albayalde, umabot sa 145 katao ang naaaresto sa tatlong raid na isinagawa sa mga drug den sa Salaam Compound.
Mantakin ninyo, sa mga nadakip na mga suspek ay kabilang ang isang miyembro ng Abu Sayyaf at isang hinihinalang druglord sa lugar.
Sa tatlong magkakasunod kasi na operasyon na pinangungunahan ni Supt. Danilo Mendoza ng Talipapa Police Station at QCPD District Public Safety Batallion, kabilang sa mga sinalakay ang dalawang bahay na ginagawang drug den daw na inooperate nina Hadjirul Abraham at Juraid Sahiddun na umano’y miyemro ng Abu Sayyaf sa Libyan St.
Dito na naaresto sina Sahiddun at Abraham na kapwa nasa drug watchlist ng QCPD Police Station 3 at killalang mga distributor ng droga sa Culiat compound.
Umaabot sa 91 na suspek ang nadakip na aktong bumabatak ng shabu, at 18 dito ang pawang mga babae at pito naman ang menor-de-edad na ang edad ay 14 hanggang 17-taong gulang.
Sa pangatlong raid ay isa pang bahay sa Libyan St. na ginagawa ring drug den na ino-operate ng isang alyas Richard Betchayda at kasama sa mga naaresto ay ang limampu’t tatlong katao at iba pa.
Biruin ninyo, ang Culiat ang sinasabing isa sa mga “untouchable” na lugar sa QC dahil hindi ito mapasok-pasok ng mga kapulisan ng QCPD dahil protektado ito ng ilang mga tiwaling pulis.
Pero nang maupo bilang officer in charge (OIC) director si Eleazar ay nabuwag nito ang “Culiat Drug Trading Syndicate.”
Ang nakapagtataka rito, sa kabila ng marami nang nahuhuli sa mga anti-illegal drug operations sa pamumuno ni Eleazar, patuloy pa rin sa bisyo ang mga adik dahil lulong na sila.
Gayunman, patuloy pa rin na ipinatutupad ni PNP chief Gen. Ronald dela Rosa ang programa ni Pangulong Digong Duterte kaya naman sunod-sunod na raid ang inilatag ni Eleazar sa mga lugar na hinihilang pugad ng mga nagpapalaganap ng lligal na droga.
BOOKIES EMPIRE SA MANILA, ‘DI MABUWAG
Ang bookies ng karera raw ni Lito de Guzman ay patuloy na namamayagpag sa Maynila.
Lumalawak pa nga ang puwesto nito sa mga lugar gaya ng Sampaloc, San Andres, Tondo, Binondo, Malate at Sta. Cruz na pawang nasa Maynila.
Hindi umaaksyon ang mga law enforcer dahil sa ibinibigay na lingguhang I.N.T. ni Lito de Guzman.
***
Anomang puna o reklamo i-text sa 09189274764, 09266719269 o i-email sa juandesabog@yahoo.com JUAN DE SABOG/JOHNNY MAGALONA
