WALANG nilulutong kudeta laban kay Pang.Rodrigo Duterte. Ni hindi man lang daw ito napapag-usapan sa kanilang cabinet meeting, ayon kay Presidential Spokesperson Ernie Abella, kaya walang dapat ipangamba ang mamamayan.
Ang lumalabas pa sa balita, ang tropa raw nina Sen. Antonio Trillanes at ilang taga-Liberal party ang umano’y nasa likod ng planong kudeta laban kay Pang. Duterte na kinibit-balikat lamang ng gobyernong Duterte.
Sa nakalap naman na balita nitong si Secretary to the cabinet na si Leoncio Evasco, inginuso raw ng kanyang “reliable source” na may nagbabantang magkukudeta laban kay Duterte, (ay naku, Presidente, ‘wag kang maniwala riyan).
Sa totoo lang, kahit ilang beses ninyong pagtangkaang i-kudeta si Pang. Duterte ay hindi siya natatakot sa banta ninyo dahil tahasan nitong sinabi na kahit anong oras ay handa siyang umalis sa kanyang puwesto dahil hindi naman siya tulad ng iba na kapit-tuko sa kanilang puwesto.
Kasabay naman nito ay nagbanta si Presidential Communications Office (PCO) Sec. Matin Andanar na hindi sila magdadalawang-isip na kasuhan ng rebelyon ang sinomang nais na patalsikin si Pangulong Duterte.
Ang sinomang nagbabalak na tanggalin sa puwesto o mag-”coup de’ état” ay dapat mag-isip-isip sa kanilang gagawin.
May natanggap kasi si Andanar na ulat mula sa isang miyembro ng gabinete na may mga Filipino-American na nais mawala ang Pangulo sa pwesto sa 2017.
Kaya kaagad na pinaiimbestigahan niya kung sino-sino ang mga taong nasa likod nang pabagsakin ang Punong Ehekutibo.
Ano ba naman ‘yan, kailan pa ba matatapos ang mga ganitong pagbabanta sa tuwing may mga bagong Pangulo na kapag tinik sa lalamunan ng mga kritiko ay wala silang ipinananakot kundi ang kudeta.
Kailan ba kayo magbabago at makikipagtulungan sa mga leader ng bansa?
DROP BALL SA STA BARBARA, PROTEKTADO BA NI HEPE?
HANGGANG ngayon ay patuloy ang magdamagang puwesto piho na drop ball nitong si Juvy sa gitna ng plaza roon ba sa Old Municipal hall sa Sta Barbara, Pangasinan.
Wala pa ring aksyon si Sta. Barbara chief-of-police Maj. Rex Infante para mapatigil ang magdamagang pwesto piho na drop ball nitong si Juvy.
Baka naman malaki ang ganansya na natatanggap nitong si hepe kaya hindi niya matibag ang drop ball na ito?
oOo
Anomang puna o reklamo i-text sa 09189274764, 09266719269 o i-email sa juandesabog@yahoo.com. JUAN DE SABOG/JOHNNY MAGALONA
