MAGANDANG malaman na nag-picnic ang isang batalyon commander ng Armed Forces of the Philippines at tatlong lider ng New People’s Army sa Brgy. Sta. Cruz sa Placer sa lalawigan ng Surigao del Norte.
Pawang mga walang dalang armas ang mga ito nang magkita-kita.
Kaya masayang naghiwa-hiwalay makaraan sina Lt. Col. Rico Amaro, ng 30th Infantry Battalion at Ka Edroy, political officer ng Guerilla Front 16, Ka Lucas, lider ng NPA at Ka Oto, spokesman ng nasabing front.
LOKAL NA ISYU
Lokal na isyu umano ang kanilang napag-usapan subalit hindi idinetalye ang mga ito.
Pero siyempre, kasama rito ang hindi pagpapaputok ng baril laban sa isa’t isa kung sila ma’y magkikita-kita o magkukrus ang kanilang mga landas.
Karaniwang ding pinag-uusapan kung paano hindi dapat na madamay ang mga sibilyan sa mga hindi pagkakaunawaan.
Pagpapatuloy ng diwa ng ceasefire o tigil-putukan at pagpabaya sa mga mamamayan na gawin ang karaniwang buhay ng mga ito gaya ng pagsasaka at iba pa.
DAPAT TULARAN
Ayon kay Amaro, dapat na tularan ng ibang mga pwersa ng gobyerno at NPA ang nasimulang pagkakaibigan ng magkalabang puwersa.
Kung magaganap nga naman ang mapayapang pagtatagpo ng magkabilang panig, sino ang hindi matutuwa?
Ang totoo, ang mga mamamayan ang higit na makikinabang sa mapayapang pamayanan.
Hindi na sila mababalot ng takot sa pagkadamay sa mga giyera. Hindi na sila puno ng takot na umalis sa kanilang mga tahanan o bumalik kaya.
Ang paghahanapbuhay nang hindi nangangamba na mamatay o masaktan kahit saan at kahit kailan ay hindi masusukat na kalayaang mabuhay.
Ang pagsasaka, ang pangingisda, ang pamamalengke at pagtitinda, ang pagdadala ng mga maysakit sa mga ospital o pagpasok ng mga doktor sa mga liblib na lugar para sa mga may sakit, ang pagdadala ng tulong sa mga oras ng kalamidad ay maayos na magaganap.
LAGAS NA BUHAY
Isa rin sa napakahalagang bunga ng pagkakaibigan ng mga magkalabang panig ang kawalan ng makikitil na buhay, kawalan ng pag-aaksaya ng mga pondo sa digmaan at sa halip ay magamit ito para sa mga mabubunga na tulngan sa isa’t isa.
Magiging mapayapa rin ang kalooban ng mga pamilya ng mga ito at hindi laging nag-aala na may mamatay, mabalda, mawala nang hindi na kailanman matatagpuan at marami pang iba.
Hindi na kailangan pang magkaroon ng mga medalya na palatandaan ng kagitingan at kung may medalya man, walang iba kundi ang ngiti sa isa’t isa na magkababayan at hindid dapat na nag-uubusan ng lahi.
AYAW SA KAPAYAPAAN
Marami ang ayaw sa kapayapaan. Sila ang mga gustong laging magkaroon ng gulo at patayan bilang paraan ng pag-andar ng mga negosyo.
Ang mga tagabenta ng mga bala at armas, eroplano, barko, sasakyang panlupa at iba pa.
Karaniwang mga dayuhan ang gumagawa at suplayer ng mga armas pandigma at pamatay-tao. Sa kapayapaan, patay ang kanilang negosyo.
Ayaw rin ang kapayapaan ng mga gustong mag-angkin ng mga malalaking lupain sa bansa, gaya ng mga minahan.
Sapagkat sa kapayapaan, magkakaroon ng karapatan ang mga nawawalan ng lupa at napagsasamantalahan na magreklamo sa mga kinauukulan.
Sa pagkakaroon ng giyera, napalalayas ng mga armado ang mga mamamayan sa kanilang mga lugar at tinatakot at pinapatay ang mga ito sa pagrereklamo at paggigiit ng kanilang mga karapatan.
Ganito rin ang nakikita sa hanay ng mga malalaking negosyo na pag-aari ng mga dayuuhan na may mga kasosoyong Pinoy na mayayaman o bilyonaryo.
Sa kapayapaan, gaya ng nagaganap ngayon, natutunan at nagkakaroon ng tsansa ang mga obrero ang lumaban halimbawa sa end of contract o endo at mababang pasahod.
Kung may armadong hidwaan, ginagamit ang mga sundalo at pulis para pagpapatayin ang mga mareklamong obrero, ang kanilang mga lider, ng mga makapangyarihang negosyante.
Tawagin lang na komunista at terorista ang mga lider manggawa, todas na sila o basta na lang sila nawawala.
BANTAYAN SILA
Dapat na bantayan ang mga ayaw sa kapayapaan.
Saan man anggulong tingnan, gagawa at gagawa ang mga ito ng paraan na magkagulo.
Halimbawa, maaaring sila ang magpapatigil kay Pangulong Rodrigo Duterte sa paggampan ng kanyang tungkulin sa ngalan ng iba’t ibang dahilan.
Si Duterte ngayon ang nagsusulong ng anti-ENDO, anti-mining na masama at pang-aapi ng mga oligarch at dayuhan.
oOo
Anomang reklamo o puna ay maaaring iparating sa www.remate.ph o i-text sa 09228403333. ULTIMATUM/BENNY ANTIPORDA
