NITONG Enero 14 at 15, nakahuli ng 11 drug dealer ang Quezon City Police District, kabilang na ang isang barangay kagawad ng 308 ng Maynila na si Ben-Ali Kisol alyas “Mino-al.”
Ang iba pang nahuli ay kinilala ni C/Supt. Guillermo Lorenzo Eleazar, direktor ng QCPD, na sina Allan Viray, Roldan Lobina, Norman delos Santos, Jordan Paul Mateo, Victoria Trono, Danilo Lozano, Zernan Ramos, Lala Kisol, Abdullah Casarigan at Wilinda Gonzales.
Sa magkakahiwalay na paghuli sa kanila, nakumpiska sa mga ito ang P1-milyong halaga ng shabu.
Ang patuloy na operasyon ng QCPD sa pumumuno ni C/Supt. Eleazar kung saan nakahuhuli ng mga drug dealer at nakakukumpiska ng shabu, nangangahulugan lang na talamak pa rin ang iligal na droga sa Quezon City.
Nangangahulugan din na hindi natatakot ang mga sindikato ng iligal na droga at ng kanilang mga tulak sa lungsod sa kampanya ng administrasyong Duterte laban sa iligal na droga na seryosong ipinatutupad sa Quezon City ng QCPD sa pamumuno ni C/Supt. Eleazar.
Mayroong nag-text (09194189…) sa akin na ang sabi’y isang “Arceo” ang nahuli raw dahil sa iligal na droga, ngunit nakalaya uli.
At isang pulis-QCPD na SPO2 ang ranggo na adik daw, ngunit hindi tinatanggal sa serbisyo.
Alam ko, ipaaasikaso sila ni C/Supt. Eleazar.
EJK SA CALOOCAN CITY
PATULOY na iniimbestigahan ng pulisya sa Caloocan City ang sunod-sunod na extrajudicial killings (EJKs), alinsunod sa utos ni Supt. John Almazan.
Ang masama kasi sa EJK sa Caloocan ay mayroong nadadamay na mga menor-de-edad.
Hindi kaya dahil, marami na ring menor-de-edad na drug dealer?
Sa datos ng Philippine Drug Enforcement Agency, makikitang mayroong substansyal na bilang ng mga menor-de-edad na drug dealer na rin.
Ang alkalde ng Caloocan City na si Mayor Oscar Malapitan ay todo-suporta sa kampanya ng administrasyong Duterte laban sa iligal na droga, sapagkat ayaw na ayaw ni Malapitan na masira ang buhay ng mga residente ng lungsod, lalong-lalo na ang kabataan.
Ngunit, hindi gusto ni Malapitan ang EJK, kaya hangad niyang maresolbahan ito ng pulisya sa lalong madaling panahon.
===
Problema at hinaing n’yo, itawag, o i-text sa: 09985650271. BADILLA NGAYON/NELSON BADILLA
