MAHIGIT limang kilo [raw] ng shabu ang nasabat ng mga operatiba ng Philippine Drug Enforcement Agency (PDEA) Region 7 sa pamumuno ni Director Yogi Ruiz.
Si Director Ruiz ng PDEA Region 7! Siya itong opisyal ng PDEA na taas-noo sa pag-amin na nagbigay ng utos upang tanggalan ng saplot ang lahat ng preso roon sa Cebu ilang araw pa lang ang nakararaan.
Ang katwiran ng opisyal na ito, hubo’t hubad ang inabot ng mga preso upang maging ligtas ang mga operatiba habang siniyasat nila ang pasilidad ng kulungan.
Naisip ito ng magaling na si Director Ruiz sa kabila ng sunud-sunod na batikos ng mga Human Rights group, lokal man o dayuhan. Ganito katindi ang bilib sa sarili ng Ruiz na ito.
Ilang araw makalipas ang hubaran sa loob ng kulungan kung saan promotor itong si Ruiz na umani ng sangkaterbang batikos ay napakatulin ang paghihiganti ng naturang opisyal ng PDEA.
Tinatayang P20-milyong halaga ng shabu ang nasakote mula sa kanilang operasyon sa Talisay City. Nasakote rin ng mga bata-batuta ni Ruiz ang sinasabing ‘major distributor’ ng shabu sa Central Visayas.
Nang iutos ni Ruiz ang pagpapahubad sa mga preso ay umani ito ng batikos mula sa taumbayan pero ngayong nakasabat sila ng mahigit limang kilo ng shabu aba’y marapat lang na papurihan ang Ruiz.
Ang pangunahing suspek na kanilang nasakote ay tinawag na si Marwin Abelgas na inamin naman talaga na bumalik siya sa pagbebenta ng shabu para panggastos sa kaniyang kabuhayan.
Huminto raw siya noon makalipas siyang makalaya sa kulungan nang dahil din sa kasong pagbebenta ng iligal na droga pero muli siya ngayong nagbenta… pero hindi raw ganoon karami batay sa ulat ni Ruiz.
Ang ibig bang sabihin nito’y dinagdagan nitong si Ruiz ang mga nasabat na ebidensya upang lumaki ang istorya pabor sa kanya upang pagtakpan ang kanyang kapalpakan ng hubaran ng mga preso?
***
Para sa komento o suhestyon: eksperto71@gmail.com. EKSPERTO/JOIE O. SINOCRUZ, Ph.D.
