IPINAGKAKATIWALA na lamang ni Pangulong Rodrigo Duterte sa mga mambabatas na nagsusulong na sampahan ng impeachment complaint si Vise-President Leni Robredo kahit nakiusap na ang Punong Ehekutibo na huwag ng ituloy ang nasabing kaso.
Kung inyong matatandaan, isa si House Speaker Bebot Alvarez ang nanindigan at tumututol sa pakiusap ni Pangulong Duterte na huwag nang ituloy ang pagsampa ng impeachment complaint laban kay VP Robredo.
Ipinagmatigasan pa ng nasabing Speaker na tanging dito lamang niya susuwayin at hindi niya susundin ang Pangulo dahil ito ay nakasaad sa kanilang mandato base sa Konstitusyon.
Pangalawa, kung pagbabasehan natin ang tatlong sangay ng gobyerno, ang legislative branch ang may karapatang gumawa ng mga batas, mag-amyenda at magpasalawang-bisa ng mga ito gamit ang kapangyarihan na ibinigay sa Kongreso ng Pilipinas na nahahati ang institusyong ito sa Senado at Kapulungan ng mga Kinatawan.
Kaya may karapatan nga naman na ituloy ni Speaker Alvarez ang kanyang paghahain ng impeachment complaint laban kay VP Robredo dahil ang ginawa raw ni Robredo ay isang impeachable offense.
Kaya, tuloy ang impeachment (kaya magbalot-balot ka na VP Robredo, hindi ako ang may sabi niyan). He..he..he.
MALAKAS KINA GOBERNADORA AT PD
PATULOY pa rin ang kaliwa’t kanang operasyon ng mga puwesto pijo ng drop balls sa lalawigan ng Nueva Ecija dahil binigyan na raw ng luwag ng lokal na gobyerno ng nasabing lalawigan.
Sa bayan ng Rizal, Nueva Ecija, ang may pa-drop balls na operator ay si Edison na nagmamalaki na malakas daw siya kay Gov. Czarina “Chery” Umali kaya tuloy ang pasugalan nito at sa bayan naman ng Sto. Domingo ang puwesto pijo ng drop balls ni Jovie na malakas naman kay N.E. PD Supt. Antonio Yarra.
Totoo ba ito?
oOo
Anomang puna o reklamo, i-text sa 09189274764, 09266719269 o i-email sa juandesabog@yahoo.com. JUAN DE SABOG/JOHNNY MAGALONA
