DAPAT paimbestigahan ni Quezon City Mayor Herbert Bautista si Barangay Commonwealth Punong Bayan Maning ‘Manny’ Co para matukoy kung saan galing ang yaman nito.
Mayor Bautista, si Co ay mayroong Mini Cooper at Toyota Land Cruiser. Malaki rin ang bahay nito.
Kung sweldo lamang ng pagiging kapitan ng barangay ang kita nito buwan-buwan, tiyak hindi magkakaroon ng Mini Cooper at Toyota Land Cruiser at malaking bahay itong si PB Co.
Hindi kaya isa si Maning Co sa mga opisyal ng barangay na nasa listahan ni Pangulong Rodrigo Duterte na may kaugnayan sa iligal na droga bilang drug supplier o protektor ng sindikato ng iligal na droga?
Hindi kaya may pinatatakbo ring mga iligal na sugal tulad video-karera, iligal na negosyo tulad ng 5 – 6, kumikita sa bangketa, at iligal na terminal ng tricycle?
Dapat paimbestigahan talaga ni Mayor Bautista si Maning Co upang malaman kung bakit milyonaryo na ang punong barangay na ito.
Sa Brgy. Commonwealth, isang alyas Alvin ang nagpapa-5 – 6, isang alyas Niño ang may hawak ng video-karera, isang alyas Boyet ang kumokolekta ng renta sa bangketa ng mga vendor na nakapayong ang puwesto, at isang alyas Arman naman ang kumukuha ng bayad sa iligal na terminal ng tricycle.
Hindi pinatitigil o pinahuhuli ni Co sina alyas Alvin, alyas Nino, alyas Boyet, at alyas Arman.
Kung hindi kayo kayang patigilin ni Maning Co, si Quezon City Police District Director, C/Supt. Guillermo Lorenzo Eleazar, ang magpapatigil sa inyo.
Si C/Supt. Eleazar pa, hindi lamang ang mga sangkot sa iligal na droga ang puntirya kundi lahat ng iligalidad.
LALAKAS ANG OPERASYON-LINIS SA CALOOCAN
LALAKAS ang operasyon-linis ni Mayor Oscar Malapitan sa Lungsod ng Caloocan, sapagkat dinagdagan ito ng puwersa ni Rep. Along Malapitan.
Kaya, inaasahang higit na malilinis ng administrasyon ni Malapitan ang Caloocan, sapagkat lumahok na rin ang puwersa ni Rep. Malapitan.
===
Problema at hinaing n’yo, itawag, o i-text sa: 09985650271. BADILLA NGAYON/NELSON BADILLA