NAKALADKAD sa kontrobersya ang Kamara del Representantes nang balewalain ni Speaker Pantaleon Alvarez at ng kanyang ‘kanang kamay’ na si Majority Leader Rodolfo Fariñas ng Ilocos Norte ang desisyon ng Court of Appeals na palayain ang anim na kawani ng Pamahalaang Panlalawigan ng Ilocos Norte o ‘Ilocos 6.’
Ilang ulit na dinala ng sheriff ng CA sa Kamara ang desisyon ng CA, ngunit gayundin karami ang pagbasura ni Fariñas sa desisyon ng korte.
Inakusahan pa ni Alvarez ang tatlong huwes ng CA na pawang “siraulo” at “gago.”
Nanakot pa si Alvarez na kayang ipabuwag ng Kamara ang CA kung gugustuhin nito dahil ang Kongreso ang gumawa sa CA.
Maraming nagalit at bumatikos sa dalawang opisyal, lalo na kay Fariñas na ang katotohanan ay naging majority leader ng Kamara makaraang kumaripas na umalis sa Liberal Party (partido ni Benigno Cojuangco Aquino III) noong Hulyo 2016 at lumipat sa PDP-Laban (partido ni Rodrigo Duterte).
Kumbinsido silang mga kritiko na maling-mali ang pambabatikos nina Alvares at Fariñas sa CA.
Isa sa mga bumatikos sa liderato ng Kamara ay si Atty. Mandy Mercado Anderson.
Si Anderson na nagtapos ng abogasya sa Ateneo de Manila University ay ika-5 sa 10 nanguna sa 2015 bar exams.
Siya ay nagtatrabaho sa isa sa mga pangunahing law firm sa Pilipinas bago maging chief of staff ni Bureau of Customs Commissioner Nicanor Faeldon.
Sa kanyang personal FB Account, inakusahan ni Anderson si Alvarez na “imbecile,” dahil sa pananakot nito sa CA.
Ang ibig-sabihin ng imbecile ay “istupido” at “idyot.” Personal na opinyon iyon ni Anderson.
Ngunit, naging paksa ng publiko ang akusasyong imbecile si Alvarez nang banggitin ito ni Fariñas sa pagdinig ng Committee of Ways and Means ng Kamara hinggil sa pinalusot (sa green lane ipinaraan kaya libre sa sitahan) na P6.4-bilyong halaga ng shabu sa BOC ilang linggo na ang nakalilipas.
Dahil kay Fariñas, muling nakaladkad ang Kamara sa ‘masamang estado’ o ‘kahihiyan.’ BADILLA NGAYON/NELSON BADILLA
