SA wakas ay umaksyon ang National Capital Region Police Office at hinuli ang saklaan sa Malibay, Pasay City na pinatatakbo ni Rom Bakla noong nakaraang Miyerkules.
Gayunman, sa Pasay ay patok na patok ang iligal na sugal sa Pilapil Street, Humildad Street, Maricaban area, Malibay area, Santo Niño area, Pasay Blvd., Muñoz Street, Estrella Street at Maginhawa St.
Bukod sa hawak na color games, nagsisilbi rin umanong kolektor si PO3 Angelito Bebet Aguas ng ilang opisyales ng Southern Police District, Eastern Police District at Parañaque Police.
Itong si Aguas ay nag-aplay raw ng lateral entry para maging opisyal.
Hindi lang iligal na sugal sa Pasay ang hawak ni Caloy Colanding dahil may saklaan siya sa Ilaya, Divisoria sa Maynila at Olongapo City.
Patok na patok din sa Pasay ang color game at P1,000 ang napupunta sa kapitan ng barangay at P500 sa PCP, lalo na kapag may patay sa lugar sa Macopa, Don Carlos, Santo Niño, Pilapil, Mulawin, Maginhawa, Estrella, Dapitan, Humildad, Malibay, Maricaban, Tramo at sa likod ng eskwela ng Pasay West. May saklang tago naman sa Tolentino St.
Palabas lang daw na galit si Pasay City Mayor Tony Calixto sa iligal na sugal pero ang totoo ay may basbas ito mula sa kanya at kay Pasay Police Chief S/Supt. Diony Bartolome.
Bukod kay Brian Colanding na kapatid ni Caloy, isang alyas “Spike” umano ang isa sa mga bida sa Criminal Investigation and Detection Group dahil isa siya sa namamahala ng koleksyon.
Namamayagpag din ang iligal na bookies ng karera sa Pasay na pinatatakbo ng isang “Christian” na kamag-anak ng isang konsehal sa Pasay.
Kasama niya sa iligal na aktibidad ang isang “Dennis”.
May lotteng, EZ2 at “ending” din si Christian at enkargado niya si Roger sa motorpool sa harap ng Pasay City Cockpit sa Cementia St. Si Ruben ang may hawak sa Salud St. sa F.B. Harrison St. Sa likod ng motorpool makikita si Aling Che na nag-o-operate rin para kay Christian.
Tinatawagan natin ng pansin sina CIDG Dir. C/Supt. Roel Obusan, Parañaque Chief S/Supt. Leon Rosete, SPD head C/Supt. Tomas Apolinario, Jr., EPD Chief S/Supt. Romulo Sapitula, Manila Police District (MPD) head C/Supt. Joel Coronel, Olongapo City police Chief S/Supt. Melchor Cabalza III at lalo na si PNP Dir. General Ronald dela Rosa.
Kahit anong ganda ng batas ay magsisilbi lang itong palamuti kung hindi naipatutupad.
***
SHORT BURSTS. Para sa mga komento o reaksyon, mag-email sa firingline@ymail.com o mag-tweet sa @Side_View. FIRING LINE/ROBERT ROQUE, JR.
