ISA raw sa dahilan ng mabagal na pag-angat nating mga Filipino sa buhay ay ang madalas na ‘di natin pagsunod sa takdang oras o “Filipino time” kung tawagin. Lagi raw tayong late.
Ang hindi maganda at hindi maipagmamalaking reputasyong ito ay tumatak na sa ating mga Filipino.
Ito ang nagpatunay na magaling tayong mga Fili-pino sa iba’t ibang larangan at kayang makipagsabayan sa kahit na sino sa mundo, hindi pa rin naihihiwalay sa atin ang pangit na reputasyong ito ng “Filipino time”.
Kailan lang ay napirmahan ng Pangulo ang “Republic Act 10535” o Philippine Standard Time (PST), kung saan isinabatas na at gagawing eksaktong magkakapareho ang oras sa lahat ng opisina ng pamahalaan, nasyonal man o lokal. Idinek-lara rin ng batas na “National Time Conciousness Week” ang unang linggo ng taon.
Sa ilalim ng batas na ito ay kailangang makipag-ugnayan ng bawat opisina at ahensiya ng gobyerno sa Philippine Atmospheric, Geophysical and Astronomical Services
Administration minsan sa isang buwan upang siguruhin na tugma ang oras ng mga opisina sa PAGASA. Dahil PAGASA ang magbibigay ng oras ayon sa Network Time Protocol.
PAGASA rin ang naatasan na makipag-ugnayan sa Department of Science and Technology upang masubaybayan at mapanatili ang Philippine Standard Time sa buong bansa.
Siyempre pa, may kaukulang parusa ang bawat paglabag sa batas.
Tulad ng iba pa nating mga batas na tamang implementasyon pa rin ang kailangan upang maging epektibo ang batas na ito at makamit ang mabuting layunin.
Talaga namang may national standard time ang mga bansa pero ang mahalaga ay kung paano ito makatutulong sa ikabubuti at ikauunlad ng bayan.
Ang pagpasok at pag-uwi sa trabaho sa tamang oras, ang pagrespeto sa “takda at tamang oras para sa mga bagay” ay ilan lamang sa maraming binibigyang diin ng RA10535.
Sa huli, disiplina pa rin ang kailangan at pagpapahalaga sa kahalagahan ng bawat oras ng ating buhay.
