KUNG mayroon mang mga mahahalagang pagbabago na dapat isagawa ng pamahalaan, dapat na kabilang dito ang reporma sa pulisya at traffic enforcer.
Mukha ng pamahalaan sa mamamayan ang mga ito at kung ano ang makikita ng huli sa una, siya na rin ang mismong pamahalaan.
Ang masakit, mukha ng korapsyon at pandarambong ang nakikita o nababanaag kaya ng mamamayan sa mga pulis at traffic enforcer.
Kaya naman masasabing higit na korap kaysa taga-pagtaguyod ng “Tuwid na Daan” ang mga nasa pamahalaan sa kabuuan?
KOTONG ANG INAATUPAG
Sa mata ng maraming mamamayan, mas gusto ng mga pulis at traffic enforcer ang mangotong kaysa tumupad sa kanilang mga tungkulin.
Ang mga pulis na dapat lumaban sa krimen ang nangunguna pang gumawa ng krimen o kasabwat ng mga kriminal sa gawain ng mga ito.
Ang mga traffic enforcer na dapat mangasiwa sa daloy ng trapiko ay pangongotong din ang higit nilang inaatupag sa panghuhuli na naaayon sa quotang minamando sa kanila ng mga bosing nila.
MASAKER AT SALVAGING
Palatandaan ng kabulukan ng mga pulis ang mga nagaganap na masaker at salvaging na ginagawa umano ng mga ito.
Ang Atimonan Massacre na nag-ugat sa pakikipag-agawan ng mga pulis sa mga teritoryo sa mga iligal na sugal ang isang palatandaan.
Palatandaan din ang salvaging o pagpapatahimik ng mga ito sa mga ordinaryong kriminal na kanilang kasabwat, kinukunsinti at utusan sa paggawa ng krimen mula sa kidnapping for ransom hanggang sa droga, pangongotong at marami pang iba.
Palatandaan din ang katahimikan ng mga ito sa mga nakamamatay na kalamidad kaugnay ng mga pagguho ng mga lupa sa maraming dako ng bansa sanhi ng magnetite o blacksand mining.
Nakapaninindig-balahibo ang mga pangyayaring ito na direktang kinasasangkutan ng mga pulis.
KOTONG COPS
Nagkakandalugi-lugi ang mga negosyo, malalaki o maliliit, dahil sa mga kotong cop.
Sa Metro Manila lamang, halos walang trak na pangnegosyo ang hindi pinapara ng mga ito para lamang kotongan.
Pati ang mga delivery truck ng mga nagbibiyahe ng mga pagkaing bigas, gulay, karne at isda na binibigyang luwag ng pamahalaan ay hindi libre sa mga ito.
Lahat ng sulok at kanto ay ginagawang mga lugar ng checkpoint para lang sila magkapera nang ligal na iligal at iligal.
Pangongotong ang ligal na panghuhuli ayon sa quota ng mga nakatataas dahil ang dulo nito ay ang interes na magkamal sila ng salapi mula sa komisyon nila sa panghuhuli.
Ang mga dyipni, bus, tricycle, pedicab ay hindi libre sa pangongotong ng mga ito at ginagawa ito hindi lang sa mga lansangan kundi sa mismong mga terminal at asosasyon ng mga ito.
Haytek pa ang pangongotong ng iba dahil ipinahuhulog sa ATM ang mga salaping kanilang kinokolekta.
WALANG PATAWAD
Walang patawad din ang mga traffic enforcer kung manghuli ng mga motoristang pampubliko o pribado.
Paniniwala ng marami, ang pagiging istrikto ng mga ito sa kanilang pagtupad sa tungkulin ay hindi upang mapaganda ang daloy ng trapiko kundi upang lumaki nang husto ang parte nila sa komisyon sa mga multa sa mga traffic violation kuno na ikinakarga nila sa mga motorista.
Bibihira ang mga may tratong tao sa mga motorista at ‘yang pagkaperahan ang mamamayan ang higit na inaatupag ng mga ito.
BALIGTAD NA PANINIWALA
Sa ating paniniwala, kakaunti lamang ang mga iskalawag sa hanay ng mga pulis at traffic enforcer.
At ang masama, ang mga bulok o iskalawag na ito ay mabilis na sanhi ng pagkabulok ng nakararami na sa totoo lang ay hindi naman bulok.
Ngunit sa pakikipanayam natin sa mga mamamayan, baligtad ang kanilang mga karanasan.
Bibihira umano sa mga ito ang hindi bugok at ugok at ang nakararami ay pare-parehong bugok at ugok.
Sabi, ang mga uniporme, tsapa at baril ay higit nang sumpa sa mamamayan kaysa grasya mula sa pamahalaan.
Kaya naman, higit nang natatakot kaysa nagtitiwala ang mga mamamayan sa mga kapulisan.
At nasisira na rin ang imahe ng pamahalaan dahil sa kagagawan ng mga ito sa mamamayan.
Higit pa umano ang mga pulis at traffic enforcer sa tagak na nakatuntong sa likod ng kalabaw dahil bukod sa mga hari ang pagtingin nila sa kanilang mga sarili, lalo pa nilang ibinabaon sa hirap at kagutuman ang mamamayan dahil sa tongpats nilang gawain.
PAGBABAGO SA SONA
Yaman din lang na binanggit sila ng Pangulo, lalo na ang kapulisan, bilang mga matatapat na alagad ng pamahalaan at lingkod-bayan, nararapat lang na muling silipin ang gawain ng mga ito kung ipinadadala na sila sa mga lansangan at komunidad o barangay.
Dapat na pakinggan ng pamahalaan ang mga mamamayan na nagsasabing higit na perhuwisyo ang mga parak at traffic enforcer kaysa tagahatid ng ginhawa sa mamamayan at tagadala ng magandang balita mula sa pamahalaan.
BUWAYA SA ITAAS AT SA IBABA
Mukha ng pambansang pamahalaan ang mga pulis samantalang sa mga lokal na pamahalaan ang mga traffic enforcer.
Pangit tingnan na may buwaya na sa itaas, may buwaya pa sa ibaba.
Buwaya ang tawag ng mga tsuper sa mga alagad na ito ng pamahalaan na dapat ay magkaroon na ng malawakang pagbabago.
oOo
Anomang reklamo o puna ay maaaring iparating sa 09214303333.
The post REPORMA SA PULISYA AT TRAFFIC ENFORCER appeared first on Remate.
