MGA pulis-Marikina ang laman ng media nitong mga nakaraang araw dahil sa pinamalas nilang mabuting asal na, para sa karamihan, ay ‘di na pangkaraniwan sa ating kapulisan. Kaya, tamang-tama ang balak nina Cong. Miro Quimbo, Mayor Del de Guzman at Vice Mayor Fabian Cadiz na parangalan ang mga pulis na ito na nagbigay ng karangalan sa Marikina.
Si Crying Cop, PO1 Joselito Sevilla ay nakitaan ng netizens sa social media ng humanity at compassion sa nangyaring dispersal operations noong SONA. Actually, hindi lang si Sevilla kundi pati ‘yung dalawang tao sa hanay ng mga aktibista ay nakitaan din ng compassion sa ginawa nilang pagpapakalma sa pulis-Marikina na may malambot na puso.
Sabi nga ni Inday Espina Varona na award winning ang istorya at litrato ni Rem Zamora ng ABS-CBN News. Para naman sa batikang photographer ng Phil. Star na si Walter Bollozos, ang talagang gustong sabihin ni Sevilla ay “Huwag kayong magalit sa amin dahil ginagawa lang namin ang trabaho namin. Sa katunayan, hindi pa nga kami kumakain at kulang kami sa tulog.” Ang pagkaintindi raw kasi ng iba ay umaangal si Sevilla.
Sa honest cops naman, ikinatuwa nina Quimbo, De Guzman at Cadiz ang katapatang ipinakita nina SPO4 Noel Rufon, SPO1 Francis Gonzales, at PO2 Joel Soriano matapos magbalik ang mga ito ng isang pitaka na naglalaman ng P50,500.
Dakong alas-11:15 ng umaga noong Hulyo 17 nang nagpapatrulya ang mga nabanggit na pulis sa kahabaan ng JP Rizal St., Brgy. Kalumpang, Marikina City nang makita ng mga ito ang isang pitakang kulay brown na naglalaman ng nasabing halaga.
Agad na ipinagtanong-tanong ng grupo kung sino ang may-ari ng pitaka at tinawagan nila ang numerong nakasulat sa papel na nasa loob ng pitaka at kanilang nakausap si Mark Joseph Ordonez y Balcueva na nagsabing si Lawrence Fajardo y Gagawanan ang may-ari nito.
Ayon kay Fajardo, ng E. Rodriguez St., Manggahan, Pasig City, ang salapi ay gagamitin sanang pambili ng mga paninda para sa kanilang tindahan ngunit nang makarating siya sa Marikina Public Market upang mamili ay natuklasan niyang nawawala ang kanyang pitaka.
Naibalik ang salapi kay Fajardo noong Hulyo 18.
Sinabi ni Mayor De Guzman na pamarisan sana ng lahat ang ipinakitang katapatan sa tungkulin ng tatlong pulis at magsisilbi ring modelo para sa lahat. Nawa’y dumami pa ang lahi nitong mga Honest Cop at Crying Cop!
The post CRYING COP AT HONEST COPS PARARANGALAN SA MARIKINA appeared first on Remate.
