NOONG nakalipas na Martes, Hulyo 30, ipinagdiwang ng Philippine Drug Enforcement Agency ang kanilang ika-11 anibersaryo at binigyan sila ng 12 bagong sasakyan at iba’t ibang protective equipment.
Tinanggap ni PDEA Director General Undersecretary Arturo G. Cacdac, Jr. ang 12 Isuzu Crosswind XT kung saan 11 dito ay galing sa General Appropriations Act administered by the Procurement Service of the Department of Budget and Management (DBM) samantalang ibinigay naman ang isa ng Philippine Charity Sweepstakes Office o PCSO.
Binigyan din ang PDEA ng mga protective equipment tulad ng 217 modular tactical bullet-proof vest, 89 units ng sando-type bullet proof vest at 153 units ng Kevlar tactical helmets.
May iba’t ibang bala rin ang ibinigay sa PDEA tulad ng 30,000 rounds ng kalibre 5.56mm, 10,000 rounds ng kalibre 45, 9,300 rounds ng caliber 9mm at 2,500 rounds ng 12-gauge shotgun.
Ipamamahagi ang lahat ng ito sa lahat ng regional office para sa kanilang kampanya laban sa droga.
Sana ay maging pantay pantay ang pamamahagi ng mga ito sa regional offices para hindi pagmulan ito ng selosan at awayan ng mga opisyal.
Gamitin din sana ang mga sasakyan ng maayos at huwag itong ipagkatiwala sa mga barumbadong driver dahil ‘di birong halaga ng pera ni Juan dela Cruz ang ipinambili rito.
QCPD, NAGPAKITANG GILAS NA NAMAN
NAKATUTUWA naman ang mga ipinakitang gilas ng mga tauhan nitong si Quezon City Police District (QCPD) Director, Chief Supt. Richard Albano, dahil sa sunod-sunod na magagandang trabaho nitong mga nagdaang araw.
Una ay ang pagkakaaresto sa lider ng “Buhat Motorcycle Gang” na si Wilster Chan at ang kasabwat nitong buyer na si Al Jacen Mercado sa Quezon City noong Hulyo 17 ng mga operatiba ng Anti-Carnapping Section ng QCPD.
Sumunod dito ang pagkakaaresto sa limang miyembro ng “Gaga Robbery Goup” matapos ang magkasunod at magkahiwalay na operation na ikinasa ng Criminal Investigation & Detection Unit (CIDU) ng QCPD.
At ang pinakabago at pinakahuli ay ang pagkakarekober sa kinarnap na kulay pulang Toyota Vios na may plakang ZSX 854 na sasakyan ng PTV-4 reporter na si Emil Carreon.
Ang sasakyan ni Carreon na ipinarada sa tapat ng isang SPA sa Cristobal St., Brgy. Kaunlaran nang ito’y tangayin umano ng isang therapist na kinilalang si Niño Liew Villanueva, 24, na tinutugis ngayon ng QCPD.
Mukhang inaabot talaga ng suwerte itong si Gen. Albano. Mantakin mo nga namang nasungkit na nga ang inaasam na Estrella ay sunod-sunod pa ang magagandang trabaho ng kanyang mga tao.
Good luck po Gen. Albano, sana ay marami pang magagandang trabaho ang malutas ng inyong mga operatiba.
Bukas po ang Lily’s Files para sa inyong mga reklamo, suhestiyon at komento, mag-text lang po sa 09165571946 at 09087230036 o kaya ay mag-email lamang sa …lpr_2012@yahoo.com …
The post SASAKYANG IBINIGAY SA PDEA GAMITIN NANG MAAYOS appeared first on Remate.
