PAANO parurusahan ni Pangulong Benigno Aquino III ang kabarilan, kababayan at kaibigan niyang si Virginia Torres na hepe ng Land Transportation Office (LTO) na nakunan ng larawan habang nasa loob siya ng isang casino?
Nakunan si Torres na nakabukaka pa ang mga paa habang nasa harap ng isang slot machine na kanyang pinipindot-pindot na parang hindi niya alam na bawal sa mga gobyerno ang pumasok sa anomang pasugalan katulad ng casino.
Nang kumalat ang video ni Torres sa Internet ay walang kibo si PNoy, hindi katulad nang pag-alipusta niya sa mga ahensya ng gobyernong kinamumuhian niya.
Ilang araw ring no comment si PNoy, katulad ng kanyang no-comment nang ma-hostage at mapatay ang karamihan sa mga turistang taga-Hong Kong sa tapat ng Quirino Grandstand sa umpisa ng kanyang termino.
Nang tila yata nahimasmasan, si PNoy ay pumunta sa Mandaluyong City, kasama ang kanyang kaalyadong si Cong Boyet Gonzales na sinasabing isa sa mga nakinabang sa pork barrel noong panahon ni Gloria Macapagal Arroyo.
“Heads will roll,” pananakot ni PNoy ilang araw o linggo matapos ang Luneta massacre. Pero walang ulong gumulong.
Wala ring ulong gumulong nang ma-video ang political adviser na si Ronald Llamas habang akmang bumibili ng pirated DVDs na labag din sa batas.
Paliwanag kuno ni PNoy: Baka lang daw naparaan si Llamas sa tindahan ng DVD.
Anyway, sabi ni PNoy, ang sigalot na iyan ay wala sa kanyang priority.
Ang sabi naman ni Torres na kabarilan din ni PNoy at Llamas, siya raw ay naparaan lang sa casino para samahan ang isang hindi kilalang kaibigan.
Ano ang sagot ni PNoy sa casino scandal?
Bahala na umano si Transportation and Communications Secretary Emilio Abaya sa kaso ni Torres.
Sa takbo ng kaso, malamang na absuwelto si Torres.
Huwag lang silang magkabarilan.
The post LTO CHIEF TORRES, KABARILAN appeared first on Remate.
