MASUSUKAT ang katapatan o kawalanghiyaan ng isang tao sa pagkakaroon o kawalan ng “delicadeza.”
Ito Ang Totoo: ang lahat ng opisyal ng pamahalaan ay dapat merong “delicadeza” na hindi gagamit ng posisyon para sa personal na pakinabang.
Itong “delicadeza” ang hindi nakita kay Olongapo Vice Mayor Rodel Cerezo at mga konsehal na sina Edic Piano at Tet Marzan sa usapin ng pagbibigay ng “gratuity pay” sa 2010-2013 “Board of Trustees” ng Gordon College na pag-aari ng pamahalaang lungsod.
Ang naturang “Board of Trustees” ay binubuo ni noo’y mayor James “Bong” Gordon, ngayo’y Vice Mayor Rodel Cerezo, Konsehal Tet Marzan, Konsehal Edic Piano, noo’y City Budget Officer Bebeth Marzan at city hall employee na talunang kandidato sa pagka-barangay chairman na si Edwin Piano.
P15,000 kada taon ang hiling na “gratuity pay” kaya bale P45,000 sa tatlong taon para sa bawat miyembro ng “Board of Trustees.”
Gumanda raw kasi ang takbo ng Gordon College sa panahon ng kanilang panunungkulan kaya dapat silang bigyan ng “gratuity pay” at sa konseho ng Olongapo isinalang ang panukala.
Ito Ang Totoo: dahil makikinabang sina Edwin Piano, na kapatid ni Konsehal Edic, at Bebeth Marzan, na kapatid ni Konsehal Tet, dikta ng “delicadeza” ay dapat mag-inhibit sila sa botohan.
At dahil sila mismo – sina Konsehal Edic Piano at Konsehal Tet Marzan, tulad ni Vice Mayor Cerezo, bilang miyembro ng “Board of Trustees,” ay direktang makikinabang kaya lalong dikta ng “delicadeza” na dapat hindi sila makibahagi sa botohan.
Pero walang pakundangang bumoto pabor sa “gratuity pay” sina konsehal Edic Piano at Tet Marzan kaya nagtabla ang botohan na 5 pabor at 5 kontra.
Para i-break ang “tie,” bumoto ang “presiding officer” na si Cerezo na pabor sa pagbibigay ng “gra-tuity pay” para sa kanya at 2010-2013 “Board of Trustees.”
Hindi pa nagkasya sa P4,000 bawat isa kada meeting nila at humihirit pa ng kita.
Kahihiyan ng hanay ng mga lokal na mambabatas ang asal nina Piano at Marzan kaya dapat pag-aralan kung sila’y may dapat panagutan.
At sa mga punong bayan naman, puwedeng pumulot ng aral sa ginawang pag-veto ni Mayor Rolen Paulino laban sa panukalang “gratuity pay” para proteksiyunan ang interes ng bayan.
Ito Ang Totoo!
At sa mga punong bayan naman, puwedeng pumulot ng aral sa ginawang pag-veto ni Mayor Rolen Paulino laban sa panukalang “gratuity pay” para proteksiyunan ang interes ng bayan.
Ito Ang Totoo!
The post DELICADEZA AT MGA OPISYAL NG BAYAN appeared first on Remate.
