SUMASAKIT ang ilong ng mga dumaraan sa panulukan ng Maritan Hi-way at Binictican Drive sa Subic Freeport dahil sa umaalingasaw na amoy kubetang hindi nililinisan.
Ito Ang Totoo: doon umaagos ang “sewage” o daluyan ng dumi ng tao ng Hitachi Factory.
Sa isang ipinagmamalaking “world-class” na lugar bilang destinasyon ng turista at sentro ng negosyo, malaking kuwestiyon ang kakulangan o kapalpakan ng “sewerage system.”
Bukod sa hindi kaaya-aya, panganib pa sa kalusugan ng tao at panira sa kalikasan ang naturang umaagos na katas ng dumi ng tao.
Sa lugar na ito pa naman ang daan patungo at galing Binictican Housing kaya nalalanghap hindi lamang ng matatanda kundi pati ng mga bata ang pabango yata sa mga kinauukulan kaya hindi inaaksiyunan.
Pati mga lokal at dayuhang manlalaro ng “golf” ay tila dinidiskurahe sa pagpunta sa “golf course” Subic Freeport dahil sa amoy ng Hitachi.
Ito Ang Totoo: ang Subicwater ang pribadong kompanya na may kontrata sa suplay ng tubig at pamamahala sa “sewage” ng Subic Freeport at Olongapo City.
Pitong (7) taon na lang ang natitira sa 25-year contract nito pero hanggang sa ngayon, hindi pa nito nakukumpleto ang obligasyon na ayusin ang “sewerage system” ng Freeport at ni hindi pa nauumpisahan ang sa Lungsod ng Olongapo.
Habang nananatiling palpak ang “sewerage system” sa Freeport, tila walang intensyon ang Subicwater na gawin ang sa Olongapo sa susunod na pitong taon at magiging “leverage” pa para ma-renew ang kontrata nito at magkaroon ng pagkakataon sa panahon ng bagong kontrata.
Dapat nang kumilos ang Subic Bay Metropolitan Authority (SBMA) at ang pamahalaan ng Lungsod ng Olongapo, ngayon din, ukol dito.
Kailangan ding bantayan ito ng mga investor at residente kapwa ng Freeport at Olongapo dahil negosyo, buhay at kalusugan nila at mga anak nila, ang nakataya. Ito Ang Totoo!
The post BAHO NG HITACHI, SUBICWATER appeared first on Remate.
