ISANG nakagugulat at nakagagalit na tagpo ang nangyari kay Celestino “Leloy” Bustamante, pasahero ng PAL galing Cebu City noong Pebrero 12, 2014.
Sumakay s’ya sa accredited taxi ng NAIA Terminal 2 na mas kilalang Philippine Airline (PAL) terminal.
Matapos niyang kunin ang kanyang mga bagahe sa carousel ay dali-dali siyang lumulan sa isang accredited taxi ng NAIA Terminal II na nakaparada sa labas mismo ng airport.
Ang naturang taxi ay bigay ng mga tinatawag na “caller” ng PAL terminal at ayon sa kanilang mga tuntunin ay flat rate. Lubhang ikinagulat ni Ginoong Bustamante, dahil siya ay pinagbabayad ng 2,400.00 pesos ng taxi driver, mula NAIA 2 patungong National Water Resources Board (NWRB), NIA Road, Quezon City. Nang makita ng driver na sya’y nagalit, ibinaba n’ya agad sa 1,200.00 ang rate. Nasaan na ang flat rate na sinasabi ng kanilang caller? Maliwanag na panloloko ang ganitong modus ng mga airport taxi sa PAL terminal.
Ayon kay Sir Leloy, ang nasabing taxi ay pag-aari ng Pacific Blue Transport at walang carbon paper ang kanilang resibo. Alam kaya ng may-ari ng taxi na P1,000.00 ang kanyang ibinayad dahil blanko ang duplicate copy?
Kaya nga sa airport accredited taxi sumasakay ang mga turista, local man o foreign ay dahil flat rate. Pagkatapos ay masyado naman pala silang mananaga sa pasahero at hahaluan nila ng pandaraya.
Sa ibang bansa, paglabas mo sa custom baggage inspection area, ang daming transportion services sa loob ng airport na magbibigay ng mga flat rate service na puwede ninyong pagpilian paglabas ng airport, ipapakita lamang ang binayarang resibo.
Maging makatwiran kayong mga airport taxi operator at maging mabuti sa ating turista. Sapagkat, sabi nga ng nakararami, hindi sa lahat ng bagay ay salapi ang dapat nating pairalin sa buhay.
The post NAIA–PAL TERMINAL NAGSASAMANTALA SA MGA PASAHERO appeared first on Remate.
