NAKAAALARMA ang ibinulgar ni Sen. Grace Poe na pagnanakaw ng pera sa mga ATM machine.
Sabi ni Poe, ang scam ay isang tahimik na problema pero hindi batid na lumalawak.
Simula nang mauso ang pagnanakaw sa mga ATM, umaabot na umano sa P220 milyon ang nakukulimbat ng mga kawatan. At sa iba-ibang ATM machines nangyayari ito.
Nakabababahala ang pagkakahuli ng ilang taong gumagamit ng skimming devices sa ATM machines para makopya ang sensitibong impormasyon sa ATM card ng mga lehitimong may-ari para magamit ito sa paggawa ng isang kopya na gagamitin sa pagwi-withdraw mula sa account.
Isa na nga sa nahuli ay isang miyembro pa mismo ng Presidential Security Group (PSG). May isa pang dayuhang Italyano na naaresto.
Napansin ni Sen. Poe na walang nakukuhang proteksyon sa mga banko ang mamamayan na biktima ng ATM fraud.
Noong nakaraang taon lang, 2,500 kaso ng ATM fraud ang naitala sa bansa.
Bagama’t maliit na bilang ito kumpara sa milyun-milyong gumagamit ng ATM, dapat pa rin itong bantayan, ayon kay Poe.
Kinakailangang magkaroon ng mga hakbang para protektahan ang integridad ng sistema ng pagbabangko.
Dapat protektahan ang ATM users, lalo na ang mga umaasa sa kanilang suweldo para sa kanilang pang-araw-araw na kabuhayan.
***
HIYANG-HIYA naman tayo sa mga gasolinahang nagbawas ng presyo ng kanilang produkto.
Ang suki nating Shell, pati Petron, Caltex at iba pa ay nagbawas ng 30 sentimos sa diesel at kerosene. Huwaaawww!
Pero wala naman silang ibinawas sa gasolina.
Nahirapan pang magdesisyon ang mga kompanyang ito bago nag-rollback. Pinag-isipan muna nang malalim.
O, hindi ba’t nakahihiya? Parang ang laki ng utang na loob natin sa kanila. King-ina n’yan!
Ito ang kauna-unahan nilang nag-rollbak sa taong ito.
Hintayin naman natin ang kanilang pagtataas ng presyo. Baka pinasasarap lang nila tayo.
Kapag sila’y nagtaas, siguradong magmumura na naman tayo.
Anak ng kutong busog talaga!
The post PAGNANAKAW SA ATM appeared first on Remate.
