SA araw na ito, 103 taon na ang nakararaan ay opisyal na kinilala ang Masbate bilang isang lalawigan o probinsya.
At sa napakahabang panahon na lumipas ay napakaraming politiko ang halinhinang gumahasa, este, nagmaniobra sa lalawigan kong mahal.
Ayon sa kuwento ng ilang matatanda, sa mga nailuklok na gobernador ay mayroon din umanong mahuhusay magpatakbo o ‘yun bang may tunay na damdamin sa aking lalawigan.
Ngunit sa abot ng aking personal na pagkakaalam, ang ilan sa mga nailuklok na gobernador ay masama at mayroon din namang napakasama! Ehek!
Sa totoo lang, parekoy, sa loob ng ilang araw na pag-iikot sa Masbate ay marami tayong napuna na bago sa ating paningin. Isa na riyan ang magandang gusali ng Masbate Provincial Hospital. Ika nga, anoman ang sabihin ng kanyang mga kalaban sa pulitika, pero ang mga bagay na ito ay naganap sa ilalim ng pamumuno ng kasalukuyang gobernadora na si Hon. Rizalina “Dayan” Seachon Lanete.
Dahil diyan, isa tayo sa nagpapasalamat kay Gov. Dayan Lanete sa kanyang ipinakitang pagmamalasakit at pagmamahal sa Masbate… At sa mga Masbatenyo.
Happy 103rd Anniversary Masbate!!!
-o0o-
MASAMA raw ang loob ni PNP Chief, Director General Alan Purisima dahil sa mga pahayag ni S/Supt. Conrad Capa kung saan personal itong naniniwala na ang kanyang pagkabalibag sa Cebu ay bunsod ng kanyang pagkahuli sa milyonaryong si Delfin Lee.
Sa totoo lang po, Gen. Purisima, kahit sinong matino mag-isip ay mahihirapang tanggapin ang iyong palusot na ang “transfer” ni Col. Capa ay isang promosyon!
Ika nga, ramdam ng karamihan na ang pagbaklas mo kay Col. Capa bilang hepe ng Task Force Tugis ay konektado sa pagkahuli niya sa milyonaryong si Delfin Lee.
At ang masakit pa, Gen Purisima, baka makapagdulot ito ng mensahe sa ating kapulisan na malilintikan din ang sinomang pulis na huhuli sa mga “big time” na wanted na gaya nina Gen. Jovito Palparan, Ruben Ecleo at sa magkapatid na Gov. at Mayor Reyes!
Ilang opisyal ang ating nakausap, kaya raw masama ang loob ni Gen. Purisima dahil hindi man lang siya itinuring na ama. Dapat daw ay kinausap muna siya ni Col. Capa bago ito naglabas ng hinaing sa media.
King-inang pahayag na ‘yan.
Ikaw ba, Gen. Purisima, ay itinuring mo na anak si Col. Capa? Kinausap mo ba siya nang masinsinan bago ang kanyang transfer? Ipinaliwanag mo ba sa kanya ang totoong dahilan ng kanyang pagkakasibak?
Magpakaama ka, sir, para ituring kang ama! Hmp!
The post HAPPY ANNIVERSARY, MASBATE AT PREMYO KAY COL. CAPA appeared first on Remate.
