KULANG 3 taon na lang ang natitira bago sumapit ang presidential election ng 2016 kung kaya’t marami ang nagtatanong kung magiging epektibo pa kaya ang endorsement ni Pangulong Noynoy Aquino.
Ang endorso na lang kasi ni PNoy ang natitirang alas ng Liberal Party sa 2016 na kung saan ang gagawing pambato nito ay si DILG Sec. Mar Roxas.
Medyo mabigat kasi ang laban ni Roxas kay VP Jojo Binay kung kaya’t importanteng masukat ngayon pa lamang kung gaano ang bigat ng endorso ni PNoy sa kanyang dating running-mate noong 2010.
Sa pagtataya ng pulitika sa bansa, mahalagang-mahalaga na maanalisa ng maaga sa endorsement ng kasalukuyang liderato dahil dito magsisimula ang pag-aaral kung saan dapat itutok ang gagawin nilang istratehiya at kampanya.
Importante rin na mapag-aralan ang posibleng ibabagsak ng popularity ni PNoy bago sumapit ang 2016 dahil dito rin sila magbabase kung gaano ang kanilang kakailanganing boto para maipanalo si Roxas.
Dapat ding timbangin ng grupong LP ang mga epekto ng nagdaang suliranin ng bansa dahil tiyak na ito rin ang gagawing basehan ng tao sa pagboto nila.
Sa madaling salita, aral-aral ang dapat gawin ni Roxas at LP dahil bukod sa markado na ang pangalang Binay sa madla ay mukhang kakampi pa nito ang buwenas lalo’t pag-uusapan ang pag-angat nito sa mga isinasagawang survey.
oOo
MUKHANG natengga na ang ospital ng Navotas.
Nadamay yata ang nasabing ospital sa pork barrel dahil ang pondo na ginagamit sa pampagawa nito ay buhat sa PDAP ni Cong. Toby Tiangco, kinatawan ng Navotas sa Kamara at kasalukuyang tagapagsalita ng UNA.
Marami ang umaasa sa ipinatatayong ospital ni Mang Toby kaya’t dapat itong tutukan ng pamahalaang nasyonal dahil hindi naman ang mga Tiangco ang kanilang iniipit kapag hindi ito natuloy dahil marami sa mahihirap na Navoteño ang umaasa rito.
The post EFFECTIVE PA KAYA ANG ENDORSO NI PNOY? appeared first on Remate.
