DAPAT nang sibakin ni Pangulong Noynoy Aquino si Al Vitangcol bilang pinuno ng Metro Rail Transit.
Ito ang napapanahong gawin ng Malakanyang dahil bukod sa usapin ng lagayan sa pagbili ng train na ibinulgar ni Czech Ambassador Josef Rychtar na nagkakahalaga ng $30 million ay hindi rin mapapasinungalingan na lumalala ang kapalpakan sa operasyon ng MRT sa bansa sa panunungkulan ni Vitangcol.
Hindi rin katanggap-tanggap sa madlang pipol ang mga excuse ng MRT boss dahil bilang pinuno ng isang ahensya ay marapat gumagawa siya ng pag-aaral at solusyon.
Naniniwala kasi tayong may solusyon ang lahat ng problema sa MRT kaya rito dapat naging maabilidad si Vitangcol lalo na’t kabuhayan ng mananakay ang nakataya rito.
Malinaw na sa konsumo pa lang sa oras ng pila ay pinapatay na ni Vitangcol ang kabuhayan ng mga anak-pawis kaya’t napapanahon na talaga ang pagsibak ni PNoy rito.
Kitang-kita rin na palaban ang embahador ng Czech Republic dahil kung hindi ito nagsasabi ng totoo ay hindi nito papatulan ang hamon ni Vitangcol sa isyu ng immunity.
Totoong tiyak ang sinasabi ni Rychtar dahil lumabas siya sa kanyang immunity at dito dapat umaksyon na agad ang Palasyo.
Tiyak na marami pang kabulukang nangyayari sa MRT operation kagaya sa usapin ng kita, kaya rito napapanahon ang paghahanap ng bagong pinuno ng naturang ahensya na may malasakit sa bayan dahil tao ang napiperwisyo rito.
o0o
UMIIYAK na si dating Pangulong Erap Estrada, mayor ngayon ng Maynila, sa rami ng problemang kanyang minana buhat sa dating alkalde ng lungsod.
Puro utang kasi raw ang iniwan ni Fred Lim at ang pinakahuli nga rito ang mahigit sa P600 milyong pagkakautang sa BIR.
Dapat nang umaksyon ni Erap sa usaping ito dahil babagsak ang kanyang siyudad kapag hindi niya inasikaso ang pagsagip dito na may kasamang kamay na bakal sa mga nagkasala.
The post VITANGCOL OUT appeared first on Remate.
