BAGAMAN hirap sa pagsuporta sa mga pangangailangan ng kanyang mga opisyal at tauhan, nanindigan si Manila Police District (MPD) director Chief Supt. Rolando Asuncion na ipatupad ang kanyang kampanya laban sa sugal sa kanyang nasasakupan.
Pilit pinagkakasya ni Asuncion ang kung anomang meron ang MPD upang makatawid sa krisis na pinagdaraanan sa kasalukuyan. Kaya nga ang laking pasasalamat ng heneral sa tulong pinansyal para sa mga pulis na ipinaabot ni Mayor Estrada noong nakaraang linggo.
Malaki nga namang tulong ang P10,000 allowance sa loob ng apat na buwan na bigay ni Estrada sa mga pulis na kinikilala ng una na malaking tulong para sa pagpapanatili ng kaayusan at katahimikan sa lungsod na kanyang pinaglilingkuran.
Tuloy-tuloy lang ang kampanya ni Asuncion laban sa iligal na sugal na ibinutas sa kanya ng ilang magigiting na konsehal ng Maynila na ang isa sa mga ito ay dating alipores ni dating Mayor Alfredo Lim at sobra-sobra kung banatan noon si Vice Mayor Francisco “Isko Moreno” Domagoso pero nang magkasakit ay si Isko ang tumulong sa kanya.
Ganu’n talaga ang buhay. Pana-panahon lang. Kaya nga mas maganda kung walang magsiraan at lahat ay kumilos para sa ikagaganda ng buhay ng lahat at hindi ng iilan.
Lamang, marami pa ring pulis ang hindi sumusunod sa “total war against illegal gambling” na ipinag-utos ni Asuncion sapagkat takot ang mga ito na magutom. Hindi sila takot na masibak sa puwesto dahil may mga padrino sila.
Natatandaan ko nang sabihin ng matikas na heneral na tatlong tao lang ang susundin niya sa kanyang panunungkulan sa Maynila: sina PNP chief Dir. Gen. Alan Purisima, NCRPO director, Chief Supt. Carmelo Valmoria at Mayor Estrada.
Kaya nga walang karapatan ang isang retiradong heneral na igiit ang sarili niya sa Manila City Hall na mag-utos sa mga pulis na luwagan ang video karera ni Gina Gutierrez dahil ito na lamang daw ang napagkukunan ng intelihensya.
Sa totoo lang, mga pulis na nakatalaga sa itinayong Task Force “GenBob” ang umiikot at nangongolekta sa iligal na sugal.
Aba naman! Huwag niyang ipagmalaki na consultant siya ni Mayor Erap at siya ang naglapit kay Gen. Asuncion sa alkalde. Parang sina Secretary Mar Roxas at PNP chief Purisima ang nakipag-usap kay Yorme, sa pagkakaalam ng marami.
Gen. Asuncion, kaibigan mo raw si GenBob? Kaya siya ang namamayagpag sa koleksyon sa sugal?
Parang mali namang gutom ka habang siya ay bondat na.
The post TF ‘GENBOB’ NAMAMAYAGPAG appeared first on Remate.
