SA halos tatlong dekada na maningning na police career, marahil ay nararamdaman sa kasalukuyan ni C/Supt. Richard Albano ang ‘nagbabagang’ pagsubok. Sa pagkakakilala ko kasi sa butihing heneral, hindi ko inisip na darating sa kanyang buhay ang katulad ng pagsubok na kanyang hinaharap ngayon.
Maraming nakaraang krimen ang naganap na buong tapang niyang hinarap at napagtagumpayan na ‘di hamak na malaki sa tinawag na ‘Fairview killings’. At ang ‘di ko matanto at maarok isipin, ilang oras pagkatapos ng nasabing krimen ay kaliwa’t kanang batikos ang ibinato kay Gen. Albano.
Kumbaga, ‘di na siya pinaporma bago man lang ito laitin. Napapabuntong-hininga lang ako at sinasabi ko sa aking sarili, ‘di nila kilala si general. Maituturing na malaking krimen, alam ko sa aking sarili at ‘di alam ng mga bumabatikos na tahimik na tumatrabaho ang QCPD para mahuli ang mga salarin.
Tama nga dahil ‘di nagtagal, naaresto ang dalawa sa killers. ‘Di man nadakip ang sinasabing pasimuno sa patayan, ang magandang balita ay kilala na ito.
Sa kaliwa’t kanang batikos na ‘yan, may naamoy akong ulat na ‘ginigiba’ si Gen. Albano para siya’y kamuhian at matanggal bilang QCPD director. Ang worry ko lang, baka si Mayor Bistek ay ‘di makayang labanan ang lakas ng pressure ng mga bumabatikos at mangyari ang ‘di dapat mangyari.
Sa totoo lang kasi, mula nang si Gen. Albano ang hepe ng QCPD, maraming mga kriminal ang nangawala – ewan ko kung saan sila nagpunta. Sa husay kasi ni Gen. Albano sa crime solution, tinawag at tinagurian siyang si ‘Nero Wolfe’, ang magaling na fiction American police detective.
Ang nangyayaring krimen ay kasama na sa buhay-pulis, kaya ang hamon at masasabi natin kay ‘Nero Wolfe’, keep up the good work general.
DAYAAN SA DERBY
NAGKAROON daw ng dayaan sa 2-cock derby ng Batangas City Councilors League na ginanap noong Mayo 8 sa Balagtas Cockpit sa Batangas City.
Reklamo ng isang nanalo, anim lang silang nagwagi pero naging siyam ang ideneklarang kampeon ng management ng Balagtas Cockpit.
Nagbanta ang mananabong na ‘di na sila magsasabong sa nasabing lugar kung ‘di maitutuwid at ‘di maibibigay ang premyo sa anim na tunay na kampeon.
The post HAMON KAY ‘NERO WOLFE’ appeared first on Remate.
