HINDI tayo pabor na ang pagiging lingkod-bayan ay dapat daanin sa pogi at ganda.
Lalong hindi aprub sa atin na ang kasikatan o karangyaan ang gawing basehan sa pagpili ng tunay na lider.
Sa ganang akin, talino at tunay na damdamin na maglingkod sa bayan ang dapat hanapin sa mga kandidato. Hindi komo artista o mayaman ay iboboto na natin. Tama rin po ang sinabi ni PNoy na mag-ingat sa mga po-litikong nagkukunwari at sa mga anting-anting!
Pero sa totoo lang, parekoy, hindi nababagay na sa bibig ng Pangulo manggaling ang mga salitang ito na halata naman talagang patutsada sa mga kalaban ng Liberal. At tukoy na tukoy ang pamilyang Revilla na kilalang sumikat dahil sa agimat!
Dapat sana ay maghanap na lang ang Team PNoy ng mga taong orador na siyang hahambalos sa mga kalaban nila.
Dahil saliwa talagang pakinggan na ang Pangulo mismo ang manganganti sa kalaban!
Sa pagkakaalam ko kasi, si PNoy ay Pangulo ng lahat ng Filipino, kasama na riyan ang mga kaibigan at mga kalaban! Paano niya ngayon hihikayatin ang mga politiko na itaas ang antas ng kampanya mula sa kinaugaliang “mudslinging” at mga personalang banat?
Be a good example naman po mahal na Pangulo maging sa uri ng pangangampanya!
Tingin kasi ng taumbayan ay quota ka na sa pasaring! Pwede?
-o0o-
KABIBIGAY pa lang ni DOJ Sec. Leila de Lima sa Pangulo ang resulta ng imbestigasyon ng NBI kaugnay sa naganap na pamamaslang ng grupo ni Col. Hanzel Marantan sa 13 katao sa Atimonan Massacre.
Wala pa ring pahayag si De Lima kung inumpisahan na ba nilang imbestigahan ang ilan pang pamamaslang ng grupo ni Col. Marantan sa iba’t ibang “shootout” kuno.
Pero heto, parekoy, at magdaragdag na naman sila ng mga target na iimbestigahan.
This time, mismong mga taga-NBI na ang kanilang susuriin kasama na pati ang Media!
Bakit, Madam Secretary, ga-ano ba kalaki ang epekto sa karapatang pantao at panganib sa buhay ng mamamayan ng nasabing “leakage” na kinakailangang unahin n’yo talaga ang imbestigasyon dito?
Mahalaga pa ba ito sa imbestigasyon sa iba pang pinagpapatay nina Marantan?
O nagagalit ka lang dahil gusto mong ikaw lang ang dadaldal sa Media at hindi ang NBI?
Parang bata na inagawan ng kendi! Hak, hak, hak!
