NOONG italagang District Director ng Quezon City Police District (QCPD) itong si Sr. Supt. Richard Albano, ay iisa lang ang sinasabi ng mga pulis , ayaw nila rito dahil hindi nila alam ang ugali.
Unti-unti ay nakuha ni Col. Albano ang loob ng kanyang mga pulis dahil na rin sa magandang ipinakita nito.
Wala pang isang buwan magmula nang italagang DD ng QCPD itong si Albano noong nakalipas na Enero 12 ay gumanda at luminis ang Kampo Karingal.
Maging ang mga butas na dinaraanan ng mga nakatatakas na suspek at ang mga butas ng pader ay pinatakpan pa nito kung kaya sa ngayon ay masasabing secure na secure ang mga pulis sa loob ng Kampo Karingal.
Kung papasok ka ngayon ng Kampo Karingal ay makikita mo itong si Col. Albano na personal na pinamamahalaan ang pagpapa ganda ng QCPD Headquarters at nakikita ito ng mga pulis kung kaya naman ang dating mga pulis na ayaw sa kanya ngayon ay gusto na siya.
Sana lang ay makita rin nitong si Col. Albano kung paanong “magkalat ng lagim”“ ang kanyang mga pulis sa loob at labas ng Kampo Karingal para sa gayun ay malinis din nito o maitapon sa basurahan ang mga bugok na pulis at sana ang ginagawang maganda ngayon ni Col. Albano ay hindi ningas-kugon lang.
Wala ring inalis o pinalitang hepe itong bagong QCPD Director dahil ayon sa kanya paano mapagaganda o makapagtatrabaho nang maayos ang isang hepe kung parati nitong iisipin na papalitan siya dahil bago ang namumuno.
May punto rito si Col. Albano, kalakaran na kasi sa Philippine National Police o sa alinmang ahensiya ng pamahalaan na kapag bago ang namuno ay kailangan ding bago ang mga tauhan nito lalo na sa mga maseselang unit o departamento.
Sinasabing marami ng umupong Director ang QCPD at ta-nging kay Sr. Supt. Albano lang daw nila nakita ang pagmamalasakit na kanilang hinahanap sa isang hepe.
Wala pa mang isang buwan itong si Col. Albano ay marami ng nalutas na kaso ang QCPD, at ito ay patunay lang na talagang nag-tatrabaho ang mga pulis dito mula sa itaas hanggang sa ibaba.
Mabuhay kayo, Col. Albano, magaling kayong hepe. Sana ay huwag n’yong pabayaan ang mga “bitbit” mong tao na maghari-harian diyan sa QCPD dahil ito ang makasisira sa inyong magandang liderato.
Isa sa mga inaangal at inirereklamo ng mga lehitimong pulis QC ay ang iyong private secretary at pinagkakatiwalaang si Major Chicharon na isa na ring sibilyan.
oOo
Bukas po ang Lily’s Files Column natin para sa inyong mga reklamo, suhestiyon at komento, mag-text lang po sa 09155683000 at 09087230036 o kaya ay mag-email lang sa … lpr_2012@yahoo.com …
