MAY nagsasabing hindi na talaga maiiwasan ng mahal kong Pinas ang bahain nang bahain sa tag-ulan at tag-bagyo.
Walang mintis ‘yan, mga Bro, dahil karanasan naman ng lahat ito.
Kaya naman, marami tayong iniisip kung paano natin harapin ang problema sa baha.
At kung ano-ano ang ating mga gagawin kung tayo’y nababaha na.
EVACUATION CENTERS
Isa sa mga naiisip natin ang kung saan tayo pupunta sa oras ng baha na nakamamatay at labis nang nakasisira.
Nakamamatay at nakasisira na ang baha kung sobrang mataas na ang tubig at lubog na maging ang mga sasakyan na tatamaan nito.
Ibang usapan na ang baha na aabot sa ikalawang palapag ng bahay o bubong ng mga bahay.
Pero sa kabuuan, naririyan na ang pagkalunod at pagkasira, hindi lang ang mga gamit kundi pati ang takbo ng negosyo at iba pang hanapbuhay.
Kung mangyari ito, kinakailangan ang mga evacuation center.
Saan ba dapat tumakbo ang mga mamamayan sa mga oras na ito?
Lalo na kung ang baha ay sumisira na mismo sa ating mga tahanan.
May nakahanda na bang mga evacuation center ang mga kinauukulan?
AYUDA SA MGA BINABAHA
Ang ikalawang dapat na pagtuunan ng pansin ng pamahalaan ay ang kalagayan ng mga kinakalamidad sanhi ng mga baha.
Naririyan nga ang kamatayan, gutom at paghihirap.
Ano-ano na ang mga naiisip na ayuda ng mga kinauukulan sa mga pangyayaring ito?
Nasaan ang mga pondo, tauhan at gamit ng pamahalaan para ayudahan ang mga mamamayan?
Sa laki at dami ng ating mga karanasan sa problemang baha, wala nang dahilan ang pamahalaan upang hindi ito mabilis at epektibo sa pagliligtas sa mga mamamayan sa mga problemang ito.
BIGAS, GAMOT, DAMIT, ISKUL
Ang mga problema sa suplay ng pagkain, kabilang na ang bigas, ang isang napakabigat na pasanin lalo na ang mga nasa evacuation center at hindi basta naabot ng mga rescuer.
Pero naririyan din ang mga problema sa gamot ng mga nagkakasakit, ang damit ng mga nahuhubaran sa pagtangay ng baha sa kanilang mga kasuotan ang mabibigat din problema.
Gayundin ang pag-aaral ng mga bata.
Alalahaning, nasisira pati ang pag-aaral ng mga bata sa paggawa sa mga eskwelahan bilang evacuation centers.
Ano-ano na nga ba ang inihahanda ng mga kinauukulan?
PRIBADONG SEKTOR
Hindi matatawaran ang pagkilos ng mga pribadong tao at kompanya para alalayan ang mga biktima ng kalamidad na baha.
Karaniwan pa ngang mas mabilis ang mga ito na kumilos kumpara sa pamahalaan.
Pero umaaray ang maraming mamamayan na may mabuting kalooban sa hirap ng buhay at hanapbuhay sa kasalukuyan.
Isa sa mga iniaaray ng mga ito ang sobrang pagpiga sa kanila mismo ng pamahalaan sa sangkatutak at walang katapusang buwis at ibang bayarin sa pamahalaan.
Bukod pa rito, mga Bro, ang pangongotong ng mga iskalawag.
Kaya naman, nakasentro pa rin ang ating katanungan sa pamahalaan kung ano-ano na ang mga paghahanda nito.
NA-YOLANDA, NA-GIYERA
Habang isinusulat natin ito, mga Bro, nasa isipan din natin talaga ang mga nasa evacuation center at tent city sa mga lugar na dinapurak ng bagyong Yolanda, lindol sa Bohol at giyera sa Zamboanga City.
Kumusta na ang mga ginagawa ng pamahalaan sa mga ito?
Sa pakikipag-ugnayan natin sa mga biktima sa mga lugar na ito, naririyan ang takot sa tag-ulan at tagbaha na rin.
Ang masakit, hindi pa ganap na napapawi ang kanilang mga pangamba na maaaring daluhungin pa rin sila ng baha na magmula sa anomang anyo ng pagtaas ng tubig.
Ang dami nilang karaingan sa kasalukuyan.
Syempre pa, ang pangunahin nilang reklamo ay ang kabagalan ng pamahalaan na tulungan silang maiayos o magtayo ng tahanan.
Pero kakambal nito ang napakahalagang usapin===ang pagkakaroon nila ng hanapbuhay.
Dapat silang pakinggan nang seryoso ng gobyerno at mabilis na tugunan.
o0o
Anomang reklamo o puna ay maaaring iparating sa www.remate.ph o i-text sa 09214303333.
The post EVACUATION CENTERS AT AYUDA SA KINALAMIDAD appeared first on Remate.