BULID sa kasamaan talaga itong si ‘Dodjie’ dahil si Gov. Vilma Santos–Recto ang kanyang ginagamit sa kanyang tong collection activities sa Batangas.
Bukod kasi kay Ate V., gas-gas din ang pangalan ni Region 4-A director C/Supt. Benito Estipona at S/Supt. Rosauro Acio sa pangongotong ng taong ito.
Ginagamit ni Dodjie sa kanyang pag-ikot sa mga iligalista sa buong R4-A ang isang PO3 Violan at SPO4 Abcede para ma-ngolekta ng tong money.
Paging Ate V., Gen. Estipona at Col. Acio…aba’y gamit na ang mga pangalan n’yo sa pangongotong, eh, kampante at tahimik pa kayo?
TARGET COLLECTION SUMIRIT
Nakapagtala ang Bureau of Customs ng mahigit Php200 million surplus sa buwan ng Enero. Ibig sabihin, tagumpay si Comm. Ruffy Biazon sa kam-panya laban sa smuggling.
Ang collection target ng ahensya para sa Enero 2013 ay nasa Php24.3 bilyon pero ang nakolekta ay Php24.5 bilyon, lumagpas ng Php200 milyon.
Ang nakikita nating dahilan ng pag-angat ng collection ay ang aktibong pagpapatupad ng kampanya laban sa korapsyon ng kasalukuyang BOC boss.
Ang giyera sa mga korap sa ahensya ay alinsunod sa pinaiiral na ‘tuiwid na daan’ ni Pangulong Aquino sa kanyang administrasyon.
Dahil sa anti-corruption campaign, takot ang mga opisyal sa pantalan na tumanggap ng bribe money sa mga gumagawa ng kalokohan sa Aduana.
Kumbaga, natakot ang mga korap na BOC head and employee na gumagawa ng kalokohan dahil tiyak na sila’y ‘di sasantuhin ni Biazon.
Kaya ang resulta – walang nakikipagkutsabahang mga opisyal at kawani ng ahensya sa mga smuggler na dahilan ng katiwalian sa mga pantalan.
Ang tumaas na collection na nangyari lamang nitong nakaraang buwan matapos ang mahabang panahon ay patunay na nagkaroon na ng reporma sa BOC.
At kung patuloy ang ganitong tema, nakatitiyak ang Aquino administration na maaabot ang target collection ng BOC sa taong ito.
At malaking porsiyento na mangyayari na maabot ang target collection sa mga senyal na nakikita natin sa liderato ni Biazon.
